Rreth mesnatës, një 14-vjeçar që drejtonte makinën e nënës së tij pa patentë, nuk iu bind urdhrit të policisë dhe mori arratinë nga zona e Çoles deri te Bulevardi “Ismail Qemali”. Në sediljen e parë ishte shoku i tij, po i mitur.

Patrulla e pikasi duke lëvizur me shpejtësi, por i mituri nuk iu bind urdhrit për ndalim dhe tentoi të godiste efektivët. Vazhdoi arratinë derisa përpara i doli një tjetër makinë policie, të cilën e goditi dhe e përmbysi në rrugë. Pikërisht në këtë mjet mbetën të lënduar dy efektivë.

Gjatë arratisë prej disa minutash, 14-vjeçari përplasi edhe makina të tjera të parkuara në anë të rrugës. Në fund, makina “Golf 4” që ai drejtonte u përplas me murin rrethues dhe i mituri tentoi të largohej me vrap, por u prangos nga policia.

Automjeti u bllokua, ndërsa nënës së tij iu pezullua leja e drejtimit dhe iu vendos gjobë. I mituri po mbahet sot në paraburgim, ndërsa prokuroria ka nisur hetimet për disa vepra penale si “Mosbindja ndaj punonjësit të policisë”, “Drejtimi i automjetit në mënyrë të parregullt” dhe “Shkatërrimi i pronës”.

Policia e Shtetit apelon prindërit që të mos lejojnë fëmijët të përdorin makinat pa patentë, për të shmangur rrezikun për jetën e tyre, por edhe të qytetarëve.