Vlorë, hakmarrja mes fisesh
shkakton viktimën e pestë

TIRANE- Hakmarrja mes dy familjeve në Selenicë të Vlorës, e lindur në 1998, shkaktoi sot viktimën e pestë. 51 vjecari Nure Xhaferraj është ezkekutar mbrëmë me armë zjarri në qytezën e Selenicës. Rreth orës 22. 30 policia e Komisariatit të Vlorës u njoftua për vrasjen.

“Nga hetimet e kryera ka rezultuar se vrasja është kryer për motive hakmarrje pasi viktima dhe familjarët e tij qysh prej vitit 1998 e deri më sot janë në konflikt me fisin Llanaj, konflikt i cili ka vijuar me vrasjet reciproke të familjarëve të tyre përkatësisht në vitet 1998, 2002, 2004 dhe 2011”- thuhet në njoftimin për shtyp të policisë së Vlorës.

Vetëm pak muaj më parë, më 26 nëntor të 2011, nga familja Llanaj ishte tentuar të vritej i vëllai i viktimës Nihat Xhaferri.
“Më datë 26.09.2011, rreth orës 12.30 në qytezën e Selenicës përpara pallatit numër 138 është tentuar të vritet me armë zjarri automatike shtetasi Nihat Xhaferaj ku si autorë të këtij rasti janë arrestuar shtetasit Altinit Hysen Aliaj (nipi i familjes Llanaj) vjec 35, lindur në Selenicë dhe banues lagjen ”Pavaresia” Vlorë, i dënuar më parë për vjedhje banke, dhe shtetasi Armando Selam Shakaj, vjec 27, lindur në Selenicë dhe banues në lagjen ”24 Maj” Vlorë. Aktualisht ndaj këtyre shtetasve me vendimin Nr. nr.557 të Gjykatës së Rrethit Gjyqësor Vlorë date 30.11.2011, është vendosur masa e sigurisë ”Detyrim Paraqitje”- njofton policia.
AUTORI NE KERKIM
Policia ka shoqëruar 6 shtetas në komisariat midis tyre të afërm të familjes Llanaj dhe është shpallur në kërkim një tjetër i dyshuar si autor i ngjarjes. Aktualisht vijon puna për kapjen e tij dhe dokumentimin e plotë ligjor të kësaj ngjarje.
Materialet procedurale do ti referohen Prokurorisë së Rrethit Gjyqësor Vlorë për veprën penale “Vrasje me paramendim” për motive hakmarrje” dhe “Prodhimi dhe mbajtja pa leje e armëve luftarake dhe municionit” parashikuar nga nenet 78, dhe 278/2 të Kodit Penal.