Lëvizja Socialiste për Integrim ka përjashtuar sot dy këshilltarët e saj Agim Kraja dhe Genta Mezini  të cilët ditën e djeshme gjatë mbledhjes së Këshillit Bashkiak  votuan pro rritjes së çmimit të ujit me 44%. 

Përmes një deklarate për mediat, këshilltarja e LSI në Bashkinë e Tiranës, Eriona Bixha u shpreh se pas mbledhjes së grupit të këshilltarëve të LSI, pas votimit të djeshëm në Këshillin Bashkiak është vendosur përjashtimi i Agim Krajës dhe Genta Mezini nga grupi i këshilltarëve të LSI.
 
“Distancohemi qartë dhe prerë nga qëndrimi korruptiv i këshilltarëve Mezini dhe Kraja. Votimi i Genta Mezinit dhe Agim Krajës në kundërshtim me vendimin politik të LSI. Genta Mezini dhe Agim Kraja nuk përfaqësojnë LSI. Duke konsideruar opozitën mision në shërbim të vendit dhe demokracise, grupi i këshilltarëve të LSI garanton qytetarët e Tiranës që shërbimi ynë është vetëm në favorin e tyre”, u shpreh Bixha.

Kryemadhi: Këshilltarët janë blerë
Gjatë ditës së sotme ka reaguar edhe kryetarja e Lëvizjes Socialiste për Integrim Monika Kryemadhi e cila u shpreh se dy këshilltarët e LSI janë blerë. Genta  Mezini dhe Agim Kraja votuan pro rritjes së çmimit të ujit. 

Votimi për ujin, nisin rrjedhjet e LSI drejt PS-së
Kryebashkiaku socialist Erjon Veliaj arriti kuorumin të mërkurën në Këshill Bashkiak me anëtarët e PS-së,  PDIU-së, një të FRD-së dhe dy këshilltarët e LSI-së.

Kjo është provë e rrjedhjes së njerëzve nga LSI e cila ngeli në opozitë, drejt Partisë Socialiste e cila është në pushtet .Kjo tendencë mund të zgjerohet në vijim.