Një atentat me armë zjarri i mori jetën mbrëmjen e së dielës në Tiranë pranë ish-Parkut të Autobusëve, 32-vjeçarit, Emiljano Boçi. Ai u qëllua për vdekje në automjetin e tij menjëherë pasi doli nga një restorant në kryeqytet i shoqëruar nga e dashura e tij dhe miku i tij Melvin Disha, 27-vjeç i cili mbeti i plagosur.

Autori ka qëlluar nga pjesa e pasme e makinës "Range Rover" në drejtim të vendit të shoferit çka tregon se objektivi ka qenë pikërisht viktima. E dashura e 32-vjeçarit i ka shpëtuar mrekullisht plumbave të këtij atentati, ndërsa mësohet se ka qenë ajo e cila ka njoftuar forcat e policisë. Banorët përreth nuk kanë dëgjuar të shtëna, çka shton dyshimet se atentatori ka përdorur armë me silenciator.

20 persona të shoqëruar
Policia ka shoqëruar rreth 20 persona të dyshuar për ngjarjen, por pas marrjes në pyetje ata janë lënë të lirë. Burime nga policia bëjnë të ditur se pistat ku po heton policia është ajo për pazaret e drogës, pasi mësohet se Boçi lëvizte vazhdimisht në Gjermani dhe Holandë dy vitet e fundit ku dyshohet se merrej me trafik kokaine, ndërsa një tjetër pistë është edhe ajo e hakmarrjes.

Kjo për shkak se Emiljano Boçi ka qenë një person i njohur për policinë e kryeqytetit. Në 2010 në Selitë, Boçi dhe shoku i tij Roland Hoxha u përplasën me armë zjarri me Astrit Malajn dhe Artur Treskën, një sherr banal i nisur nga fjalët "pse më sheh". Nga përplasja Treska dhe Boçi mbetën të plagosur, ndërsa ky i fundit u dënua për tentativë vrasje dhe para dy vitesh arriti të dalë nga burgu.

Autori u largua nga dikush tjetër
Momenti kur është qëlluar në drejtim të makinës “Range-Rover”, në zonë nuk ka patur kamera sigurie. Personi që ka qëlluar me silenciator dyshohet se është ndihmuar nga dikush tjetër për tu larguar nga vendi i ngjarjes.

Viktima dhe i plagosuri kishin pak ditë që ishin rikthyer nga Gjermania. Dëshmia e shokut të viktimës, Melvin Disha pritet që të jetë kyçe në zbardhjen e ngjarjes nëse ka arritur që të identifikojë personin që e qëlloi me armë. Policia ka nisur hetimet në konfliktet e vjetra të Boçit për të shkuar në gjurmët e autorëve, ndërsa janë shoqëruar disa persona deri tani.

d.c./shqiptarja.com