Gjykata e Krimeve të Rënda në Rimini të Italisë ka dhënë mbrëmjen e sotme dënimet për 3 të akuzuarit për vrasjen e hidraulikut Petrit Nikolli, krim i ndodhur mbrëmjen e 25 Majit në Rivabella në Rimini, para një restoranti.

Edhe pse prokurorja Paola Bonetti kërkoi në pretencën e prokurorisë burgim të përjetshëm për tre të pandehurit, gjykata vendosi: 25 vite burgim për Lek Preçin, po 25 vite burgim edhe për të birin e Lek Preçit, Edmond Preçin ndërsa për djalin tjetër të Lek Preçit, Altin Preçi u dha dënimi me 23 vite.

Petrit Nikolli u vra në mes të rrugës me një plumb pistolete në pjesën e pasme të qafës, ndërsa pak orë pas krimit, u arrestuan tre shqiptarët, Lek Preçi dhe dy djemtë e tij.

Sipas hetimeve të kryera nga policia italiane, 45-vjeçari u vra pasi po mundohej që të zgjidhte një rast konflikti brenda familjes.

Mbesa e viktimës jetonte me bashkëshortin e saj në Milano dhe prej disa kohësh kishin probleme me njëri-tjetrin. Shqiptari Petrit Nikolli kishte shkuar disa herë që të zgjidhte mosmarrëveshjet mes çiftit.

Duke u përpjekur të qetësonte situatën, këtë javë Nikolli e mori mbesën në shtëpinë e tij në Rimini, pasi ishte keqtrajtuar dhe dhunuar nga burri. Ky i fundit, së bashku me babain dhe një person tjetër udhëtuan mbrëmë për në Rimini dhe u takuan në shëtitore me Petrit Nikollin.

Debati mes tyre agravoi aq sa përfundoi me vrasje. Sapo 45-vjeçari i ktheu shpinën burrit të mbesës për të shkuar në shtëpi, ai e qëlloi me pistoletë, plumbi i së cilës e kapi në qafë duke e lënë të vdekur.

vrasesit e nikollit
(Lek Preçi, Edmond Preçi dhe  Altin Preçi)

Redaksia Online
J.Sh Shqiptarja.com