KORÇË- Ndërsa postoblloqe të shumta të policisë u ngritën në të gjithë hyrje daljet e qytetit të Korçës, pas vrasjes së 21-vjeçarit Joan Zuko, autori i dyshuar ishte fshehur fillimisht pranë varrezave të qytetit. Në orët e vona të mbrëmjes Kristjan Sterjo, 20 vjeç, është afruar për në banesën e tij. Ky ka qenë momenti kur ai është pikasur.

Fillimisht janë dy agjentë me veshje civile që i afrohen me shpejtësi dhe e shtrijnë në tokë. Më pas, janë tre policë të tjerë që afrohen në ndihmë të tyre. Në pamjet e siguruara nga Report Tv që tregojnë momentin e arrestimit, policët i bëjnë thirrje disa herë të riut që të shtrihet në tokë dhe i kërkojnë të tregojë ku është arma e krimit. Ai nuk bën rezistencë dhe më pas i vendosen prangat.

Në momentin e arrestimit ai nuk e kishte me vete armën me të cilën kishte qëlluar Zukon. Më vonë ai ka treguar se pushkwn me të cilin kishte qëlluar shokun e tij të dikurshëm, e kishte hedhur në zonën e njohur si “Fusha e druve”, ku më pas dhe është gjetur nga policia.

Ngjarja ndodhi në një nga pallatet e lagjes 15 në qytetin e Korçës, ku Johan Zuko ishte futur në tentativë për t’i shpëtuar sulmit të Sterjos, ndërsa vetë mësohet se mbante në dorë një thikë. Plumbi e goditi në pjesën e poshtme të shpatullës duke e lënë të vdekur në vend në katin e tretë të pallatit.

Në dëshmitë e para në polici, autori i vrasjes ka dhënë versionin e tij të ngjarjes. Sipas tij, me Zukon, ishte i bartur prej kohësh një konflikt që lidhej kryesisht me përplasje për dominancë mes tyre dhe pretendimet se kush ishte “më i forti” i lagjes. Dy të rinjtë dyshohet se kishin shkëmbyer vazhdimisht provokime, sharje dhe ngacmime, ndërsa vetëm disa ditë përpara vrasjes kishin pasur një tjetër konflikt verbal.

Në dëshminë e tij, Sterjo ka pretenduar se situata ishte acaruar më tej edhe për shkak të ngacmimit të së dashurës së tij nga viktima. Hetuesit po verifikojnë këtë pretendim, si dhe nëse ndërthurja e këtij episodi me konfliktet e mëparshme mes dy të rinjve ka çuar në përshkallëzimin e situatës deri në krim.

Policia ka marrë në mbikëqyrje dy familjet, për të shmangur çdo përshkallëzim të mundshëm të situatës.

Kristjan Sterjo rezulton të jetë një emër problematik, i arrestuar dhe më parë për plagosje me thikë.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

Rendit zhvillimet sipas orarit:
Ora 14:49
Para vrasjes së Joan Zukos, Kristjan Sterjo ishte arrestuar për plagosje me thikë! Del videoja që shokët i bënë me krenari teksa shoqërohej nga Policia

 

Kur Kristjan Sterjo u arrestua kohë më parë për plagosje me thikë, shokët e tij vendosën ta prisnin jashtë institucionit të sigurisë me telefonat në dorë. E filmuan teksa dilte i buzëqeshur pas përballjes me forcat e rendit dhe videon e publikuan në rrjetet sociale.

Por nuk ishte vetëm videoja që ra në sy. Në sfond kishin vendosur një këngë, ku dëgjohet fraza: “Ndoshta një ditë më shikon në kronikat e zeza.”

Pamjet kanë bërë xhiron e rrjetit pas vrasjes së 20-vjeçarit Joan Zuko në Korçë, ngjarje për të cilën Sterjo është arrestuar si autor i dyshuar.

Sterjo nuk ishte i panjohur për policinë. Ai ishte arrestuar më parë për plagosje me thikë, ndërsa në rrjetet sociale ai dhe shoqëria e tij publikonin shpesh foto dhe video nga përditshmëria e tyre. Mes tyre është edhe kjo video, ku ai shfaqet duke dalë nga institucioni i sigurisë i buzëqeshur, ndërsa shokët e filmojnë dhe e shoqërojnë postimin me vargjet e këngës që sot kanë marrë një tjetër kuptim.

20-vjeçari u vu në pranga mbrëmjen e së shtunës, disa orë pasi policia e identifikoi si autorin e dyshuar të vrasjes së Joan Zukos. Sipas hetimeve, krimi ndodhi pas një konflikti të mbartur mes dy të rinjve.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

U.D/Shqiptarja.com

Ora 10:38
‘Shtrihu në tokë’, Report Tv siguron VIDEO-n kur policia arreston vrasësin e 21-vjeçarit në Korçë: Ku është kallashi?

Report Tv ka siguruar momentin kur Policia arreston autorin e vrasjes së 21-vjeçarit Johan Zuko. Në këto pamje të filmuara nga një kamerë sigurie, dallohet 20-vjeçari ndërsa efektivët i afrohen me vrap dhe i bërtasin që të shtrihet në tokë. I riu nuk bën rezistencë. Në video dëgjohet teksa thotë me zë të ulët ”në rregull” Disa efektivë e rrethojnë, e shtrijnë në tokë dhe i vënë pranga. Aata dëgjohet teksa e pyesin se ku e ka fshehur edhe armën e krimit.

SI.E./Shqiptarja.com

Ora 10:28
Mitropoliti Anastas reagon pas vrasjes në Korçë: Kur një i ri vret një të ri, shoqëria qan për të dy

1786264283_mitropolitianastas.jpeg

Mitropoliti orthodhoks i Korçës, Hirësia e tij imzot Anastasi, ka reaguar me dhimbje për vrasjen e 21-vjeçarit Joan Zuka pasditen e djeshme në Korçë. Imzot Anastasi thotë se jeta njerëzore është dhuratë e shenjtë e Perëndisë dhe se kur një i ri vret një të ri, shoqëria qan për të dy.

“Jeta njerëzore është dhuratë e shenjtë e Perëndisë dhe askush nuk ka të drejtë ta shuajë atë. Asnjë konflikt, asnjë zemërim dhe asnjë arsye nuk mund ta justifikojë veprimin që merr jetën e një njeriu”, shprehet Mitropoliti Anastas.

Në reagimin e tij, ai ndalet veçanërisht te fakti se në ngjarje është përfshirë një i ri, duke përcjellë një mesazh kundër dhunës mes të rinjve.

“Kur një i ri vret një të ri, shoqëria qan për të dy”, thuhet në mesazhin e Mitropolitit Anastas.

SI.E./Shqiptarja.com

SI.E./E.H/Shqiptarja.com

Komente

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Kola: 09/08/2026 15:12

    Këto janë bandat e drejtësisë që i japin drejtësi këtij Populli!

    Përgjigju
  • Sondazhi i ditës: 9 Gusht, 17:40

    A mendoni se Shqipëria është e përgatitur për sezonin e zjarreve?

Lajme të tjera