A mund të sillet një parti e madhe që ka qeverisur Shqipërinë për 13 vjet, si një forcë politike e vogël që lufton të marrë ndonjë post këshilltari bashkiak në Shkodër, Vlorë apo Durrës? A mund të mungojë në një takim të madh kombëtar, siç janë zgjedhjet, një stemë që përfaqëson gjysmën e trashëgimisë politike të tranzicionit shqiptar? Dikush mund të thotë se opozita nuk do të mungojë në 14 maj pasi do të kandidojnë Berisha dhe Meta me koalicionin e tyre. E vërtetë edhe kjo, por ja që mpakja e stemës zyrtare të PD në fletët e votimit është një vakum që s’mund të kalojë pa rënë në sy. Zgjedhjet janë veç të tjerash, edhe një garë simbolesh.
Partia Demokratike zyrtare, ajo pjesë e PD që mban ende jakën e xhaketës stemën zyrtare blu me simbolin PD të stilizuar që e njohin të gjithë që nga fundi i vitit 1990, ka vendosur me vullnetin e saj që të neglizhojë rreth 75 përqind të pushtetit që do të ofrohet në 14 maj përmes zgjedhjeve lokale. Ka debatuar me orë të tëra, për të vendosur në fund që do të garojë vetëm për 25 përqind të vendeve për kryetar bashkie në rang vendi. Një tërheqje e pashoqe në një garë kombëtare elektorale, nga një parti dikur e madhe, që sot i ngjan një pasqyre të thyer në njëmijë copa.
Kjo që bën sot Alibeaj dhe të tjerët me simbolin politik që përfaqësojnë, është një kapitullim në stil të gjerë para Ramës dhe Berishës. Një zbythje pa lavdi në fushën e betejës zgjedhore, që zbulon konturet reale të asaj pjese të partisë që ende kontrollojnë. Dhe që janë tejet të vogla e pa peshë.
Pa asnjë shpjegim bindës, kundërshtarët e Doktorit brenda PD fillimisht u përpoqën të përdorin firmën e munguar të Lulzim Bashës për të mos hyrë fare në zgjedhje. Shumëkush e kupton sot se debati shterpë me Celibashin, në lidhje me firmën e Lulzim Bashës, paska fshehur një krizë të thellë, që në fakt ka qenë pjesërisht e dukshme edhe pa zgjedhjet e 14 majit në mes. Është e lexueshme gjithashtu edhe përse vetë Basha, i cili refuzon të certifikojë në gjykatë dorëheqjen nga partia, është fshehur dhe hesht në mesin e një fushate elektorale.
Demokratët “me vulë” do të duhet t’ju shpjegojnë sot e deri në ditën e zgjedhjeve mbështetësve të tyre, se përse fjala vjen PD-ja zyrtare ka kandidat për bashkinë e Mallakastrës por jo për atë të Vlorës, se pse kandidon në Lezhë por jo në kryeqendrën e të djathtës, në Shkodër, se pse ka gjetur një emër vetëm për Poliçanin por jo për Gjirokastrën. Do të duhet të shpjegojnë gjithashtu se cila është arsyeja që partia me stemën zyrtare të opozitës në xhep, nuk gjeti dot dy burra apo gra me reputacion dhe emër të mirë për dy qytete madhore si Durrësi dhe Elbasani. Si do të justifikohet Alibeaj përballë atyre opozitarëve që do të donin t’i votonin kandidatët për kryetar të PD zyrtare në këto bashki, por nuk do të mund ta bëjnë diçka të tillë?!
Harta laramane e kandidimeve që kjo pjesë e PD po i ofron sot shqiptarëve, është parathënia më e keqe jo për 14 majin, pasi atë e kanë humbur ende pa nisur, por për diçka shumë më të madhe sesa një garë për Durrësin e Shkodrën. Kjo tërheqje e pakuptimtë dhe frikacake është një parathënie e errët për luftën gjyqësore rreth simboleve zyrtare të partisë, që do të vijojë me shumë gjasë pas zgjedhjeve. Një fraksion i partisë që nuk arrin të mbulojë territorin me kandidatura, as që ja vlen të merret parasysh nga ndonjë gjyqtar, si pretendent për stemën dhe vulën zyrtare.
Kur nuk ja dolën të kenë të paktën një fushatë të ngjashme me Berishën, pse ngrefosen nëpër studio sikur po ja dalin të maten me të?! Derisa i hapën krahun kandidatëve të Foltores nëpër tre të katërtat e bashkive, pse vijojnë të pretendojnë se janë diçka e ndryshme nga Sali Berisha dhe pala e tij në PD?! Bashkohuni me ta më mirë që të kamufloni të paktën sa të mundeni humbjen përballë ish-shefit të rikthyer.
Me këtë fund pa lavdi, antiberishizmi brenda PD vijon të mbetet një foshnje e vdekur. Fundi politik i Berishës do të vijë gradualisht nga mosha dhe humbja e peshës politike në vend, e jo nga ndonjë përmbysje brenda pallatit. Sepse veç të tjerash, edhe pallatin Doktori e ka marrë për vete me hunj e shkallë zjarrfikësash në 8 janar, duke i nxjerrë në zyra me qera këta të vulës.
Komente
Lajme të tjera
-
Po tani, ka drejtësi zoti Berisha ?
27 Nëntor, 22:37
-
GJKKO i hoqi 'arrestin shtëpiak' Berishës, Kthupi në 'Repolitix': Praktikë gjyqësore, dosja ka shkuar për hetim, Berisha nuk prish më provat! Gazetari: Bien akuzat e PD për kapje të drejtësisë
27 Nëntor, 21:39 -
Spahiu: Dyshoj se për 10 vjet, nuk ka gjykatë që guxon të dënojë Berishën dhe Ramën
27 Nëntor, 21:15 -
Elezi në Report Tv: Berisha nga Partia Komuniste, dështoi me protestën! Toska: Fije shprese për mbështetësit
27 Nëntor, 21:11 -
Policia procedoi 17 deputetë për protestën, Korreshi: Lani sqetullat se na helmuat, e nuk hamë dot përshesh
27 Nëntor, 20:05 -
Evi Kokalari reagon për lirimin e Berishës: Mos u gëzoni kot, s’ka lidhje administrata e Trump! Më intereson investigimi i kullës së malit, për atë më bënë kurban!
27 Nëntor, 19:10 -
Falenderoi gjyqtaren që e liroi, por çfarë thoshte Berisha pak ditë më parë për të
27 Nëntor, 18:33
-
Ylli Pata: Mitet që rrëzoi dhe precedenti që hapi lirimi i Sali Berishës
27 Nëntor, 18:18
-
I dhj….rë , por krenar!
27 Nëntor, 18:05
-
Kreshnik Spahiu: Gjykata e 'Ramës' apo gjykata e pavarur e liroi shtetasin Berisha?
27 Nëntor, 17:00
-
Siguria në shkolla, a po përdoren fëmijët nga Qeveria dhe Opozita?
27 Nëntor, 16:37 -
Berisha me gazetarët pas lirimit nga GJKKO: Falenderova gjykatësen për vendimin, por të tjerët janë bandë kriminale! Ku i gjeti Dumani 3 apartamente?
27 Nëntor, 14:47
Si Berisha e Alibej nje topmuti jane. Brume i thartuar. Gatuar me uje Lane.
PërgjigjuKy grupim doli kundra Berishes vetem sepse e kerkuan SHBA, por ne fakt jane njelloj te brumosur me mentalitet e filozofi jane “ berishiane “.