Xhiro me makinë në Dajt me pistoletë e kanabis me vete, arrestohet burri që dhunoi policinë, gruaja tentoi të fshehë armën

TIRANË - Efektivët e komisariatit numër 4 vunë në pranga një 35-vjeçar për armëmbajtje pa leje dhe drogë ndërsa bashkëshortja e tij do të procedohet në gjendje të lirë në një operacion të koduar "teleferiku", pasi ajo tentoi të fshehë pistoletën.

Në vijim të punës për rritjen e parametrave të sigurisë, si rezultat i kontrolleve të shtuara për kapjen e personave në kërkim dhe atyre që qarkullojnë me armë zjarri me vete, shërbimet e Komisariatit të Policisë Nr. 4 kanë marrë informacion në rrugë operative se në Dajt, një shtetas qarkullonte me mjet në orët e pasdites, duke mbajtur me vete armë zjarri.

D. Q., 35 vjeç, banues në Tiranë udhëtonte me makinë në zonën e Dajtit, dhe sapo ka parë shërbimet e Policisë, ka tentuar të largohet me vrap, duke braktisur automjetin me të cilën po qarkullonte bashkë me bashkëshorten e tij, J. Q. 35-vjeçari u kap nga punonjësit e Policisë, të cilët i ka goditur dhe kundërshtuar, me qëllim evitimin e kontrollit të makinës.

Në cilësinë e provës materiale u sekuestruan 1 armë zjarri pistoletë, 1 krehër me 9 fishekë, automjeti me të cilin qarkullonte, 500 euro të dyshuara si të përfituara nga veprimtaria kriminale, 2 telefona, si dhe 1 qese plastike farmaceutike me një sasi lënde të dyshuar narkotike cannabis sativa.

Gruaja me inicialet J. Q do të hetohet në gjendje të lirë për veprën penale "Veprime që pengojnë zbulimin e së vërtetës", pasi tentoi të fshihte armën gjatë kontrollit të automjetit.

I arrestuari do të hetohet për veprën penale "Kundërshtim i punonjësve të policisë", “Prodhimi dhe shitja e narkotikëve” dhe “Armëmbajtja pa leje”, për të cilën parashikohet dënimi me burgim deri në 7 vjet.

G.M./Shqiptarja.com

TAG:
• policia e tiranes
• arme pa leje