Ylli Pata: Arsyet e përroit psiqik të njerëzve të Berishës ndaj ambasadores së SHBA

Sali Berisha, nuk ka gjasa të ketë pasur ndonjë iluzion se SHBA do të kishte një qëndrim të ndryshëm pas largimit të Lulzim Bashës.

Megjithatë, ai dhe mbështetësit e tij mediatikë, e kanë përdorur heshtjen e ambasadores amerikane në Tiranë, Yuri Kim, apo edhe të zyrtarëve të tjerë pas dorëheqjes së Lulzim Bashës, si një armë politike për të penetruar sa më thellë në strukturat e tulatura të PD-së, si pasojë e tërmetit që sollën zgjedhjet e pjesshme vendore.

Një ditë pas 6 marsit, mbështetësit e Berishës, natyrisht me inspirim nga Doktori, bënë të ditur se më shumë se një fitore ndaj Lulzim Bashës, zgjedhjet e pjesshme ishin një triumf ndaj SHBA e ambasadores Yuri Kim, ndaj arritën deri aty sa i kërkuan publikisht DASH ta shkarkonte diplomaten në Tiranë.

LEXO EDHE:
Tenderi për Porto Romanon/ Berisha: Qeveria e PD s'do njoh asnjë tender deri në 15 maj 2025! Zotohem që ai projekt s'do ndodhë kurrë

Natyrisht që e gjithë kjo taktikë totalisht e çthurur është një bllof banal, që as politikat e nivelit provincial nuk e përdorin më. Por, kjo mënyrë e të bërit politikë është marka par exellance e doktorit, që është klonuar nga enturazhi i tij në mënyrë ngjitëse, e nuk ka të dytë jo vetëm në Shqipëri.

Nuk është e vetmja ambasadorja Yuri Kim që është përballur me këtë mënyrë shantazhi provincial, pasi atë e kanë përjetuar edhe parardhësi i saj Donald Lu, paraardhësi i tij, Alexandër Arvizu, ambasadori John Withers, ambasadorët e BE-së: Romana Vlahutin e Luigi Soreca, ambasadori i OSBE-së, Bernd Botchart e shumë e shumë të tjerë.

E si për ironi të fatit, të gjithë këta diplomatë që janë agresuar nga Sali Berisha, Ilir Meta dhe njerëzit përreth tyre, kanë arritur promovime të rëndësishme në karrierën e tyre pas mbylljes së mandatit në Shqipëri.

Donald Lu-ja është sot numri dy i Departamentit të Shtetit me delegim për Azinë, po ashtu edhe Arvizu përpara se të dilte në pension u emërua zyrtar i lartë i DASH, madje edhe erdhi në Shqipëri me detyrën e re, si për t’i bërë karshillëk Berishës. Vlahutin e Soreca gjithashtu kanë poste të larta në shërbimin e jashtë të BE, kurse Botschard është këshilltar i qeverisë gjermane për Ballkanin etj.

Me një fjalë, Sali Berisha dhe njerëzit përreth, jo thjesht e kanë të qartë, por edhe e kanë provuar se ky lloj shantazhi nuk ka pirë ujë asnjëherë, e natyrisht ashtu do të ndodhë gjithmonë.

Po atëherë, përse pas takimit të ambasadores Yuri Kim me Enkelejd Alibeajn pati një përrua psiqik të një patologjie të rëndë cerebrale?

Takimi i Yuri Kim me Alibeajn është një zhvillim krejtësisht normal. Alibeaj sot është njeriu që ka institucionalisht të gjitha atributet zyrtare. Është kryetar i komanduar nga kryesia e PD-së pas dorëheqjes së Lulzim Bashës dhe kryetar i grupit parlamentar të opozitës në Kuvend.

Takimi është kryer në kohë dhe vend me një korrektesë protokollare, në zyrën që PD zotëron në ndërtesën e Parlamentit shqiptar. E Alibeaj, ka pasur e do të ketë edhe takime të tjera të këtij lloji, me diplomatë e zyrtarë të tjerë ndërkombëtarë. Takimi i sotëm nuk ishte gjë tjetër, veçse vijimi i qëndrimit zyrtar të SHBA, qëndrim të cilin Berisha dhe të tijtë e dijnë dhe e kuptojnë fare mirë.

Por sulmi kaq i dhunshëm ndaj ambasadores Yuri Kim nuk është bërë për ta shantazhuar atë, apo politikën e lartë amerikanë siç e quan avokat Ngjela, por për të mbajtur me gajret “paramilitarët” që u aktivizuan në aksionin e “rikthimit të Berishës”, e po shikojnë se gjithë mundi i tyre po shkon kot.

Nga ana tjetër, ky agression është natyrisht një sinjal tipik drejtuar prokurorëve dhe hetuesve të Prokurorisë Speciale, që kanë në duar dosje që i djegin Berishës dhe grupit të tyre. Deri më sot, ky lloj shantazhi drejtuar këtyre njerëzve, të cilët janë natyrisht të brishtë e që kanë parë tmerret e xhindosjes së Berishës në vite, ka pirë ujë madje shumë.

Por në rastin e një avancimi të sanksioneve të qeverisë amerikane ndaj personave të shpallura Non Grata, shantazhi që ka funksionuar deri tani mund të fusë ujë, natyrisht edhe vrimat që janë hapur gjithandej…/TemA

TAG:
• Lufta brenda PD
• enkelejd alibeaj
• Yuri Kim
• sali berisha
• ylli pata

Sondazhi i ditës:

Si ka qene per ju viti 2024?

• I mire

  43.9%

• I keq

  22.8%

• As i mire as i keq

  33.3%

Vota total: 1514

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq