30 nëntori afati i fundit për ‘Zgjedhoren’/ PS-opozitës: Nëse nuk vini, e miratojmë vetëm! PD: S’kemi bojkotuar, të zbatohen kërkesat e ndërkombëtarëve

Kreu i grupit të PS, Taulant Balla tha sot se nuk do të  ketë zgjatje afati për Komisionin e Zgjedhores dhe se reforma do të miratohet vetëm me votat e socialistëve nëse opozita nuk reflekton. Përgjigjen e mori nga kreu i grupit parlamentar të PD, Gazment Bardhi i cili në një postim në shkruan se opozita nuk ka bojkotuar komisionin, por ka kërkuar që Reforma Zgjedhore të përmbushë kërkesat e përcaktuara edhe nga Komisioni Europian.

"Opozita nuk ka bojkotuar asnjëherë Komisionin e Posaçëm për Reformën Zgjedhore. Ky është një fakt publik dhe lehtësisht i verifikueshëm. Nuk ka pasur asnjë mbledhje të thirrur të këtij Komisioni në të cilën përfaqësuesit tanë të mos kenë qenë të pranishëm. Ajo që po ndodh është një përpjekje e mazhorancës për të devijuar dhe penguar punën e Komisionit, duke e zhvendosur vëmendjen drejt çështjeve dytësore, të cilat nuk lidhen me rekomandimet e OSBE/ODIHR-it dhe të Komisionit të Venecias. Ky fokusim në çështje që nuk adresojnë standardet për zgjedhje të lira, të ndershme dhe të barabarta po zvarrit procesin dhe po pengon përmbushjen e detyrimeve që ka Shqipëria për garantimin e integritetit të procesit zgjedhor.

Sa i përket projektligjit për financimin e partive politike, drafti fillestar i hartuar nga Komisioni i Posaçëm i është përcjellë për vlerësim urgjent Zyrës së OSBE/ODIHR-it dhe Komisionit të Venecias. Ekspertët e këtyre institucioneve kanë përcjellë opinionet dhe rekomandimet e tyre të plota. Qëndrimi i opozitës është i qartë: të gjitha vërejtjet dhe rekomandimet e tyre duhet të reflektohen plotësisht në tekstin e projektligjit. Ky proces nuk mund të konsiderohet i përfunduar dhe projektligji nuk mund të ecë përpara pa adresimin e plotë të rekomandimeve të OSBE/ODIHR-it dhe Komisionit të Venecias.

Opozita do të vijojë të insistojë që Reforma Zgjedhore të përmbushë jo thjesht një detyrim formal apo procedural, por standardet dhe kërkesat e përcaktuara edhe nga Komisioni Europian: rikthimin e besimit të publikut te procesi zgjedhor, garantimin e konkurrencës së ndershme politike dhe mbrojtjen e integritetit të zgjedhjeve.

Reforma Zgjedhore duhet të prodhojë garanci reale për zgjedhje të lira, të ndershme dhe të barabarta, jo të shndërrohet në një proces formal që shmang adresimin e problemeve themelore të demokracisë zgjedhore në Shqipëri", shkruan Bardhi. 

Në një koment për protestat, Taulant Balla ironizoi Sali Berishën, i cili i quan vazhdimisht “studentë” pjesëmarrësit.

“Imagjinoni, Sali Berisha merr formën e një studenti 82-vjeçar. Këtë lojë mund ta luajë me këdo tjetër, por jo me ne”, tha Balla.

Partia Demokratike nuk mund të bllokojë procesin e përafrimit të legjislacionit me BE, tha Taulant Balla. Ai kundërshtoi pakësimin e numrit të KZAZ-ve dhe hapjen e listave, të dyja kërkesa të PD.

Taulant Balla: Kemi hyrë në muajin e 14-të të sesionit të tretë të kësaj legjislature. Të gjithë e dinë që kjo është legjislatura historike, ka një detyrë për përafrimin e legjislacionit të Shqipërisë me atë të BE-së. Prirja për të mbajtur peng këtë proces që qeveria e tij mos ta mbyllë këtë janë prirje që s’mund t’i pranojmë. Ligji i financimit të partive politike është i rëndësishëm edhe për zgjedhjet e 9 majit. Në Kodin Zgjedhor, për shkak të ndarjes së re administrativo-territoriale dhe vendimit që bashkitë që bashkohen t’u ruajmë përfaqësimin e drejtë, duhet t’i fusim në Kod. Ka një propozim të ODIHR për rritjen e numrit të KZAZ-ve. KZAZ-të duhet të shtohen. Çfarë e pengon PD që të bëjmë 140 KZAZ? Kemi kërkuar t’i jepet fund kësaj historie të pasens që rezultati i votimeve të dalë pas një jave.

-Me listë të hapur apo të mbyllur?

Taulant Balla: Ne jemi kundër hapjes së listave për këshillat bashkiakë. Në 2020 i hapëm listat dhe nga SHQUP-i qëllohej me top. Në Kushtetutë hapjen e listave e ka bërë PS me deputetët që nuk zgjodhën rrugën e bojkotit. Në grupin parlamentar të PS, sot 36 deputetë vijnë nga listat e hapura. Sot ke 1/3 e listës të mbyllur dhe 2/3 të hapur”, tha Balla.

Kreu i grupit të Partisë së Lirisë, Tedi Blushi, ka debatuar me socialistët në Konferencën e Kryetarëve ku ka kërkuar tërheqjen e akteve normative për tubimet. Blushi thotë se qeveria kërkon të udhëheqë me dhunë, ndërsa kritikoi Niko Peleshin për heshtjen e tij lidhur me reagimin e policisë ndaj protestuesve.

“Futja në kalendar e këtyre akteve dëshmon se doni të vazhdoni të qeverisni nëpërmjet dhunës. Kuvendi nuk mund të kthehet në noter të dhunës shtetërore. Kryeaxhenda e këtij Kuvendi nuk mund të jetë dhuna, por kërkesat legjitime të studentëve. Dhunën po e dënojnë edhe eurodeputetë, ndërsa Kryetari memec i Kuvendit nuk reagon. Po dëshmoni jo vetëm se jeni përgjegjës për krizën, por edhe nxitës të përshkallëzimit të saj. Futja e akteve normative dëshmon natyrën kriminale të kësaj shumice që kërkon të qeverisë me shkopinj e plumba gome”, tha Blushi.

Akuza hodhi edhe drejt Taulant Ballës për reformën zgjedhore, për të cilën kreu i grupit socialist tha se nëse opozita vijon bojkotin, do të shkojnë në Kuvend me propozimet e tyre. Blushi përsëriti kushtet për hapjen e listave të votimit, ngritjen e qeverisë teknike dhe zgjedhjen e presidentit nga populli.

“Me qëndrimin tënd për Reformën Zgjedhore provove se me Edi Ramën nuk mund të ketë zgjedhje të lira e të ndershme. Ti je një provokator i ulët që mbron në këtë Kuvend interesat e klaneve kriminale. Kryeaxhenda e Komisionit të Reformës të jetë vetëm hapja 100% e listave, Qeveria Teknike dhe President nga populli. Boll më me deputetë të emëruar nga kryetarët e partive, duhet t'i zgjedhë populli”, tha Blushi.

Partia Demokratike ka akuzuar mazhorancën se po bllokojnë qëllimisht nismat ligjore të opozitës, duke i mbajtur ato në sirtar dhe pa u caktuar datë shqyrtimi.

Në Konferencën e Kryetarëve, PD kërkoi përfshirjen në rendin e ditës dhe votimin e paketës me katër nisma për shfuqizimin e ligjit për Investimet Strategjike, ndryshimeve në ligjin për Zonat e Mbrojtura, ligjit për Paketën e Maleve dhe disa dispozitave të ligjit për Trashëgiminë Kulturore.

Sipas PD, bllokimi i nismave lidhet  me problematikat e evidentuara në Raportin e Komisionit Evropian, duke akuzuar mazhorancën për dobësim të kontrollit parlamentar, cenim të të drejtave kushtetuese të opozitës dhe moszbatim të vendimeve të Gjykatës Kushtetuese.

“Nuk mund të ketë demokratizim dhe as përparim në procesin e integrimit evropian, kur mazhoranca, në shkelje të rregullave, ligjit dhe vetë Kushtetutës, e trajton Kuvendin si një institucion njëpartiak, ku vendimmarrja përcaktohet vetëm nga numrat dhe jo nga respektimi i Kushtetutës, ligjit dhe rregullores parlamentare. Kthejeni këtë institucion në shinat e kushtetutshmërisë! Mos e përdorni Kuvendin si paradhomë të Partisë Socialiste. Ju nuk mund t'i trajtoni institucionet e këtij vendi si pronë private. Nuk mund t'i përdorni ato sipas interesave tuaja politike dhe as të përjashtoni opozitën nga funksionimi normal i institucioneve kushtetuese”, tha Belind Këlliçi.

Kreu i grupit të Partisë së Lirisë, Tedi Blushi, kërkoi tërheqjen e akteve normative për tubimet pasi sipas tij, janë vetëm qëllim i qeverisë për të drejtuar me dhunë.

"Futja në kalendar e këtyre akteve dëshmon se doni të vazhdoni të qeverisni nëpërmjet dhunës. Kuvendi nuk mund të kthehet në noter të dhunës shtetërore. Kryeaxhenda e këtij Kuvendi nuk mund të jetë dhuna, por kërkesat legjitime të studentëve. Dhunën po e dënojnë edhe eurodeputetë, ndërsa Kryetari memec i Kuvendit nuk reagon", tha Blushi.