‘Zgjedhorja’, Gonzato: Parakusht për anëtarësimin e Shqipërisë në BE, vija dalluese mes shtetit e partisë duhet të jetë qartësisht e theksuar! Transparencë për financimin

Kryetari i Komisionit të Reformës Zgjedhore, Damian Gjiknuri tha gjatë mbledhjes se bashkë me opozitën, kanë vendosur të dalin në një draft të përbashkët. Ai u shpreh se shëndeti financiar i partive dhe konsolidimi i tyre lidhet drejtpërdrejt me forcimin e demokracisë.

“Me opozitën kemi vendosur të dalim në një draft të përbashkët që ky ligj të mos ketë inate partizane, por rregulla të gjithëpranuara. Shëndeti financiar i partive, është një nga gjërat më të rëndësishme në një demokraci. Sa më të konsoliduara partitë, aq më e konsoliduar demokracia. Duhet transparencë për burimet financiare dhe të parandalojmë financime nga interesa biznesi të lidhura me pushtetit, interesa të shteteve të tjera apo nga krimi”, tha Gjiknuri.

Ndërsa bashkëkryetari Oerd Bylykbashi mbështeti rëndësinë e transparencës për shmangien e korrupsionit dhe ndikimin e faktorëve kriminalë e të huaj.

“Ndryshimet janë bërë në kohë të ndara. Dua të theksoj, pa hyrë në detaje, se funksionimi i partive politike është çështje thelbësore dhe kushtetuese, po aq sa transparenca e financimeve. Partitë janë organizma që shërbejnë për pluralizmin demokratik. Kjo është kërkesë kushtetuese dhe besoj se të gjithë ndajmë mendimin se transparenca është një formë e mirë për të shmangur korrupsionin dhe influencat e faktorëve kriminalë apo të huaj", tha ai.

Në Komisionin e Reformës Zgjedhore, kreu i KQZ, Ilirjan Celibashi theksoi se partitë politike nuk vendosin në dispozicion të institucioneve e publikut të dhënat financare.

“Transparenca realizohet vetëm në mënyrë pasive; Qytetarët, anëtarët e partisë dhe votuesit nuk kanë akses të drejtpërdrejtë dhe periodik në informacion; Kontrolli publik mbi financimin politik mbetet i kufizuar. Në praktikë, kjo situatë krijon një hendek të madh mes standardit ligjor dhe pritshmërive demokratike për llogaridhënie”, tha Celibashi duke shtuar se nevojitet publikim proaktiv i të ardhurave dhe transparencë.

Më pas, tha se auditimi formal i partive nuk është funksional dhe ka shpërndarje jo efikase të burimeve. Kësaj i shtohet edhe konflikti i interesit me pagesën e audituesve që përzgjidhen nga KQZ, por paguhen nga partitë.

“Rekomandohet unifikimi i procesit të auditimit. Përzgjedhja dhe pagesa e audituesve duhet të kryhet nga KQZ-ja për të garantuar pavarësi”, u shpreh Celibashi.

Kryetari i Prezencës së OSBE në Shqipëri, ambasadori Michel Tarran, tha në Komisionin e Reformës Zgjedhore se ky është një moment vendimtar për Shqipërinë. Ai tha se rinisja e punimeve është pozitive dhe tha se reforma ka si qëllim avancimin e një kuadri të ri ligjor për financimin e partive politike.

“Shqipëria ndodhet në një moment vendimtar për forcimin e integritetit dhe besueshmërisë së kuadrit të saj zgjedhor. Rifillimi i punës së Komisionit është një sinjal pozitiv. Financimi i partive politike përbën një komponent kyç për funksionimin e shëndetshëm të partive politike, për konkurrencën e ndershme dhe të përgjegjshme politike, si dhe për forcimin e besimit të publikut në institucionet demokratike”, tha Tarran.

Më tej, ai renditi 4 pika të rëndësishme si parime themelore mbi të cilat duhet të vendoset reforma.

“Transparenca: deklarimi i plotë i të ardhurave dhe shpenzimeve të partive politike, në përputhje me Kushtetutën; Barazia: zbatimi i barabartë i rregullave për të gjitha partitë politike; Zbatimi: institucionet mbikëqyrëse duhet të kenë jo vetëm një mandat të qartë, por edhe burime të mjaftueshme financiare dhe njerëzore për të ushtruar siç duhet auditimin dhe kontrollin; Sanksionet: vendosja e sanksioneve proporcionale dhe efektive për të parandaluar përfitimet e paligjshme dhe për të dekurajuar mosrespektimin e ligjit”, tha Tarran.

Në fund të fjalës së tij, ai solli në vëmendje ndihmën për lehtësimin e dialogut mes partive.

“Jemi të gatshëm të mbështesim Komisionin në lehtësimin e dialogut ndërmjet palëve të interesuara, pasi dialogu efektiv ndërpartiak dhe bashkëpunimi ndër-institucional janë thelbësore për përmbylljen e një procesi reformues që rrit besimin e qytetarëve në procesin zgjedhor dhe shton pjesëmarrjen e votuesve në zgjedhje”, përfundoi Tarran.