Zijanë e njoha rreth viteve 1970, kohë, kur në mbarë vendin filloj të ndihej një fllad liberalizmi, kur arti e kultura filluan të ndikohen nga rryma të reja bashkëkohore, ...kur „njeriu i ri“ filloj të mendojë, të sillet e të vishet ndryshe...
...kur çdo qytetari ju zgjua shpresa e lirisë e tolerancës politike, gjë që filloj të pasqyrohej në çdo qelizë të jetës...
....kur në rrugët e sheshet e qytetit tim të lindjes, shpërthyen ngjyrat, u celën fytyrat, u çlirua humori e gazi i njerëzve, u ringjall dëshira për të bukurën e për të dalë nga “kinez-eria, ...të gjithë njëlloj”...
...kur jeta kulturore e artistike mori një dimension të ri...
...kur shetitjet tradicionale të mbrëmjeve, stoliseshin nga djelm e vajza të reja, që mbanin rroba apo modele flokësh që i përgjigjeshin modës së kohës...
...kur çdo i ri vlonte nga dëshira për tu veshur bukur (sipas mundësive), shpesh me rroba që i modelonin apo i qepnin vetë, për të ngjarë me figurat e vipa-ve të njohur botërorë...
![zija karini](http://www.shqiptarja.com/foto/273658.jpg)
Në kujtesën time të asaj kohe (prej adoleshenti 15 vjeçar), kanë mbetur të fiksuar shumë djelm e vajza shkodrane, të veshur bukur edhe pse kushtet ekonomike të familjeve ishin të vështira....Më vijnë në kujtesë Kujtimi, Saimiri, Franci, Bruno, Viola, Justi apo Zija-ja e sa të tjerë...., por sot do të ndalem tek personazhi i shkrimit tim, Zija Karini.
Zija Karini lindi në Shkoder me 30 nëntor 1941 në familjen Karini, një familje atdhetare shkodrane, e njohur për traditën tashma një shekullore të përpunimit të drurit. Familja, qysh në vitet 1920, zotëronte një ndërmarrje me aktivitet ZDRUKTHATARI, me 40 punëtorë në mes të cilëve edhe 4 mjeshtër italianë, që ishte krijuar nga Xhemal Karini. Në Shkodër, ndërmarrja ishte shumë e njohur për ndërtimin e mobiljeve shtëpiake, por edhe objekteve të tjera në dru.
Mjeshtria e punimit të drurit e dinastisë së Karin-nëve, në përbërje të cilës ishin 9 marangozë të famshëm, u trashëgua dy breza, deri te Zija-ja, i cili në vitin 1954 filloj të mësoj zanatin në punishten e xhaxhait të tij, mjeshtrit Ahmet Karini.
![zija karini](http://www.shqiptarja.com/foto/273659.jpg)
Me ardhjen e regjimit komunist, punishta e tyre “ ZDRUKTHATARI”, e ndërpreu aktivitetin e saj, pasi u shtetëzua për tu kthyer në magazine mallrash shtetërorë.
Sapo hapet ndërmarrja artistike në Shkoder në vitin 1965, Zijaja fillon punën si modelist, ku në sajë të talentit e novatorizmit të tij në punë, ai merr titullin Mjeshtër (në punimet e drurit). Së bashku me kolegët e tij, mjeshtrat Kolec Thani e Ndoc Tusha, krijojnë qindra modele artikujsh artistike që, për nga bukuria dhe cilësia, dallonin në shkallë kombëtare por edhe ndërkombëtare, duke i sjellë ndërmarjes me 2000 punëtorë të ardhura të mëdha.
Zija-ja punon aty deri 1994 kur ndërmarrja u mbyll. Pas 40 vjet përvoje pune, për të mbijetuar, ai vendosë të vazhdojë traditën e familjes duke krijuar një linje private të punimeve të drurit, ku me një përkushtim të madh punon dhe sot.
Aktualisht, mjeshtri Zija Karini, ky burrë vital e plot humor, është i njohur në punimin e 13 teknikave në dru, që përbëjnë një masë të gjerë produktesh e modelesh. Ai është mjeshtër në aplikacion me metal, në teknikën e rimesimit, teknikën e djegjes, punimet në kashtë, inkasim në dru, në gdhendje e ngjyrim druri dhe në punime të drurit në torno.
Së bashku me artistë të tjerë, që punojnë në ndërmarrjen e tij, ai krijon dhe tregton suvenire, piktura në dru, piktura në pirografi, korniza të ndryshme, aplikacione në rimeso, kutiza stolish, objekte me aplikacion metali etj. Me modelet që janë tërësisht krijimet e tij origjinale, ai merr pjesë në panaire brenda e jashtë vendit ku vazhdimisht ka marrë vlerësime të larta. Punimet e tij janë eksportuar në Itali, Greqi, Austri e vendet fqinjë.
Sot, artizani Zija Karini, i cili është i fundit i dinastisë, ka arritur përsosmëri në punimin e drurit. Punimet e tija të spikatura dëshmojnë për shijen artistike, kreativitetin dhe talentin e mjeshtrit popullor, i cili është i veçantë në krijimin e figurave ornamentale dhe modeleve, që i përgjigjen plotësisht kërkesës së tregut dhe kohës.
![zija karini](http://www.shqiptarja.com/foto/273660.jpg)
Si rezultat i aktivitetit të tij të gjerë dhe karrierës së tij si artist e mjeshtër në këtë fushë ai është nderuar nga Bashkia e qytetit të Shkodres me titullin MIRENJOHJA E QYTETIT me motivacionin: “...Për kontributin shumë të vyer në zhvillimin e artizanatit shkodran. Me shijen e tij të hollë dhe duart e arta vazhdon që prej 5 dekadash të prodhojë me ndjeshmëri dhe nivel të lartë artistik, punime me larmi formash, idesh dhe kulturash, dëshmi autentike që shprehin me modesti jetën e bukur të këtij vendi”...
Sot, Zijaja, edhe pse në moshë pensionisti, vazhdon të jetë shumë aktiv.
![zija karini](http://www.shqiptarja.com/foto/273661.jpg)
Ai përveçse drejton linjën e prodhimit e biznesin e tij, për të ndihmuar brezat e rinj dhe shtresat në nevojë, ka hapur kurse për mësimin e artit të pirografisë apo të aplikimit të teknikave të tjera, duke paisur me dituri e dokumente mjeshtrie pjesëmarrësit, të cilët në shumë raste, kanë hapur linjat e veta të artizanatit, duke u bërë pjesë e tregut shqiptar por edhe të huaj.
Mendoj që për turistët që vizitojnë Shkodren, Reparti – Studio i mjeshtrit Karini tek ish Artistikja, është një pikë atraktive që ja vlen për tu vizituar.
Vjenë, me 5 shkurt 2017
![zija karini](http://www.shqiptarja.com/foto/273662.jpg)
![zija karini](http://www.shqiptarja.com/foto/273656.jpg)
Redaksia Online
Al.N/Shqiptarja.com
![](https://www.shqiptarja.com/template/img/sh_logo1.png)