Shiu mbi Belgjikën lindore të hënën në mëngjes ndihmoi zjarrfikësit për të vënë nën kontroll zjarrin më të madh pyjor të regjistruar ndonjëherë në vend, flakët e të cilit mund të arrinin deri në kufirin me Gjermaninë.

Zjarret pyjore kanë përfshirë Evropën këtë verë pas valëve të njëpasnjëshme të të nxehtit ekstrem, të nxitura nga ndryshimet klimatike të cilat kanë përkeqësuar thatësirën. Sipas të dhënave nga Sistemi Evropian i Informacionit për Zjarret në Pyje (EFFIS), këtë vit në Evropë janë djegur tashmë 576,000 hektarë, një sipërfaqe dy herë më e madhe se Luksemburgu.

Gjatë fundjavës, një çift i moshuar humbi jetën nga zjarret që përfshinë ishullin grek të Salaminës, ku 500 persona u evakuuan me traget pasi erërat e forta shtynë një zjarr drejt zonave të banuara, duke dëmtuar shtëpi. Një zjarr në Aragon, në verilindje të Spanjës, shkatërroi 16,600 hektarë, ndërsa një zjarr në qytetin turistik Omiš, në Kroaci, detyroi 1,000 persona të evakuoheshin.

Pavarësisht rënies së temperaturave, të dhënat e EFFIS treguan se pjesë të mëdha të Evropës perëndimore, jugore dhe qendrore janë ende në rrezik të lartë nga zjarret.

Rreziku ekstrem nga zjarret është bërë një dukuri e zakonshme gjatë verës evropiane vitet e fundit, pasi moti më i nxehtë dhe më i thatë i shkaktuar nga ndryshimet klimatike është kombinuar me faktorë të tjerë, përfshirë braktisjen e zonave rurale, e cila i ka lënë tokat djerrë dhe ka lejuar grumbullimin e bimësisë së thatë dhe lehtësisht të ndezshme në pyje duke favorizuar përhapjen e shpejtë të zjarreve.

Rreth 90% e zjarreve pyjore shkaktohen nga aktiviteti njerëzor, si zjarret e ndezura për kamping ose cigaret e hedhura.

Vitin e kaluar, Evropa përjetoi sezonin më të keq të zjarreve, me më shumë se një milion hektarë tokë të djegur. Disa vende, përfshirë Francën, kanë thyer tashmë rekordet e tyre vjetore këtë vit, ndërsa sezoni tradicional i zjarreve, nga qershori deri në shtator, s’ka mbaruar ende.

Dhjetëra banorë të fshatit Le Porge, në jugperëndim të Francës, ku qindra shtëpi u shkatërruan nga një zjarr gjigant muajin e kaluar, pritën me fishkëllima kryeministrin francez Sébastien Lecornu gjatë vizitës së tij në zonë. Banorët kanë kritikuar reagimin e qeverisë dhe kanë akuzuar autoritetet se u kanë dhënë përparësi përpjekjeve për të shpëtuar zonat më të pasura.

Zyrtarët belgë thanë se zjarri nuk po përhapej më në drejtim të Gjermanisë dhe ishte vënë pjesërisht nën kontroll. Banorët e evakuuar ende nuk janë lejuar të kthehen në shtëpitë e tyre.

Rreth 500 zjarrfikës nga e gjithë Belgjika, si dhe nga Gjermania dhe Luksemburgu fqinjë, së bashku me fermerë dhe ushtrinë, kanë luftuar kundër zjarrit. Ai ka djegur rreth 3,000 hektarë në rezervatin natyror me toka moçalore e pyje duke tejkaluar ndjeshëm rekordin e mëparshëm të Belgjikës, të vendosur në vitin 2011, kur u dogjën rreth 1,400 hektarë.

BE-ja ka dërguar tre helikopterë dhe dy avionë për hedhjen e ujit nga vende të ndryshme të Evropës që nga e shtuna, pasi Belgjika kërkoi përforcime emergjente.