55-vjeçari Besnik Zenuni pronari i lokalit në Velipojë, i cili u përfshi nga flakët dy ditë më parë nuk ka arritur t'i mbijetojë plagëve të marra gjatë shpërthimit të zjarrit.

Mësohet se Zenuni humbi jetën në mesnatë.

Prej dy ditësh Zenuni ndodhej në gjendje kritike për jetën, pasi  ishte djegur në rreth 95% të trupit.
 
Pas zjarrit që përfshiu lokalin e tij në Velipojë,55-vjecari u transportua në repartin e djegieve në QSUT.

Belba: Hektor Zejnuni në gjendje kritike për jetën

Së bashku me të në gjendje kritike për jetën u transportua edhe 33-vjeçari Hektor Zenuni, djali i tij i cili vijon të jetë nën kujdesin intensiv të mjekëve.

Gjergji Belba, shefi i shërbimit të djegieve plastike në QSUT shprehet se djali i Zenunit është në gjendje kritike për jetën pasi ka djegie në më shumë se 70% të trupit.

Dëshmia djalit:E mora në krah babanë,më pas dëgjova shpërthim

Hektor Zejnuni ka qënë në gjendje të komunikojë me hetuesit, ku ka thënë se ka dëgjuar një shpërthim të vogël poshtë restorantit.

“Kam shkuar kam parë babanë të shtrirë dhe e mora në krah. Kur po ngjitja shkallët dëgjova një shpërthim tjetër dhe më pas nuk e mbaj mend çfarë ndodhi” mësohet të jetë shprehur 33-vjeçari.
 
Shkak për zjarrin e përmasave të mëdha që përfshiu restorantin 'Il Cavaliero' në resortin Fishta u bë rrjedhja e gazit nga depozita 1 mijë litroshe e cila ishte fshehur në nëntokë.

Flakët u përhapën menjëherë në të gjithë restorantin duke lënduar rëndë katër persona. Ndërsa prokuroria një ditë më parë nisi procedimin penal.

Sipas organit të akuzës, deri tani ka dy pista ku po përqendrohen hetimet për "shkatërrim prone nga pamundësia" dhe "shkelja e rregullave të sigurisë teknike".

Redaksia Online
e.m/Shqiptarja.com