TIRANË- Qytetarët janë mbledhur për të tetën ditë radhazi në protestën kundër ndërtimit të resortit në Zvërnec. Me thirrjet “dorëheqje”, "Rama në burg, Berisha në Burg", ata po marshojnë nga sheshi “Skënderbej” drejt kryeministrisë.

Ndërkohë, kryeministri Edi Rama ndodhet në Elbasan për 35-vjetorin e PS ku gjatë fjalimit, ka përmendur edhe zhvillimin e turizmit që do të vijë nga investimi në Zvërnec. 

KËRKESAT E PROTESTUESVE
1-  Dorëheqjen e qeverisë
2- Shfuqizimin e statusit dhe te kuadrit ligjor për statusin strategjik
3- shfuqizimin e paketës se maleve
4- anulimin e ndryshimeve në ligjin për zonat e mbrojtura
5- anulimin e ndryshimeve në ligjin për trashëgimin kulturore shqiptare

Lajm në përditësim...

Rendit zhvillimet sipas orarit:
Ora 18:59
‘Zvërneci’, protestuesi: Le të bëhemi 1 milion njerëz këtu, ta shohë Rama sa shumë jemi!

Një tjetër protestues i pranishëm para kryeministrisë bëri thirrje që të mblidhen gjithnjë e më shumë për t’i treguar Ramës sa shumë janë së bashku.

“Sa njerëz në spitalet tona humbin të drejtën e jetës? Gjyqet për ne vazhdojnë me vite, kurse për ata firmosen ligjet brenda ditës. Kushtetuta garanton të drejtën e pronës, por sa nga ju s’kanë letrat e pronës? Sa familje jetojnë vetëm nga paratë që dërgojnë emigrantët? Çfarë ka bërë shteti i Edi Ramës për mërgatën? Le të bëhemi ne këtu në shesh 8001 njerëz, 1 milion njerëz, ta shikojë me sytë e tij sa shumë jemi për një Shqipëri pa Edi Ramën!”, tha protestuesi.

P.J/Shqiptarja.com

Ora 18:55
‘Oligarkët s’kanë limite’, protestë edhe në Pogradec kundër ndërtimit të resortit në Zvërnec

Pogradeci ka dalë sërish në protestë kundër ndërtimit të resortit në Zvërnec. Protetsuesit mbajnë në duar pankarta të ndryshme si “Oligarkët s’kanë limite”, apo “sot flamingot, nesër unë”.  

SI.E./Shqiptarja.com

Ora 18:50
‘Çohuni nga kafja’, qytetarët e Shkodrës për të dytën ditë radhazi në protestë kundër ndërtimit të resortit në Zvërnec (VIDEO)

Për të dytën ditë radhazi, qytetarët kanë dalë sërish në protestë kundër ndërtimit të resortit në Zvërnec. Protestuesit kanë parakaluar në pedonalen e qytetit dhe janë mbledhur para bashkisë, ndërsa me thirrjet “çohuni nga kafja”, kërkuan më shumë mbështetje në protestë.

SI.E./Shqiptarja.com

Ora 18:50
‘Kush e organizon protestën?’ Tubuesi shpalos ‘listën’: Një djalë me emrin Shpopullim, 35-vjeçarja Prona Private! E treta, Rinia Shqiptare

1780850775_protestaperzvernecin7qershor.jpg

Me ironi, qytetarët i janë përgjigjur pyetjes që ka mbizotëruar protestën e Zvërnecit: kush e organizon? Një protestues u ngjit në podium duke shpalosur ‘listën’, një renditje problematikash që ai renditi si pakënaqësi të forta ndaj qeverisë.

“Kam një njoftim shumë të rëndësishëm për emrat e grupit organizator, momenti i shumëpritur. I pari është një djalë 35-vjeçar që quhet Shpopullim. E dyta është një vajzë po ashtu 35-vjeçare, quhet Prona Private! E treta dhe më e rëndësishmja është shpirti i gjithë këtij organizimi këtu, quhet Rinia Shqiptare! Të katërtit janë Fëmijët tanë për të cilët kemi dalë të gjithë këtu në shesh dhe unë jam krenar! E pesta është një zonjë për nga mosha që ka lënë të paktën 160 mijë familje që presin me vite për një vendim drejtësie, Drejtësia është një nga arsyet dhe organizatoret e kësaj proteste! Shqiptarët s’mund të presin më me 10-15 vite për të marrë të drejtën e tyre! E gjashta, sot thonë mos shkofsh nëpër spitale sepse sistemi shëndetësor është një tmerr i vërtetë që mos vaftë as hasmi. I shtati, e ka lënë postulat Naim Frashëri, Arsimi! Duam arsim cilësor! E teta është Bujqësia, fermerët tanë duhet të jenë këtu, duhet tu ofrohen kushtet minimale për të prodhuar për fëmijët tanë. Të nëntët, Pensionistët! Ta bëjmë këtë luftë për gjyshërit e gjyshet tona! E fundit, minatorët, naftëtarët, ata që kanë dalë nga shtëpitë e tyre pa ditur nëse do të kthehen dhe sot janë në mëshirë të fatit!”, tha i riu duke shtuar:

“Mos harroni që për gjithë këtë grup organizator fajin e ka kjo qeveri!”

P.J/Shqiptarja.com

Ora 18:35
Protestuesja i jep 'lajmin' Ramës: Diaspora s’do të vijë për pushime, por për protestë!

Protestuesit kanë nisur me fjalimet e para duke bërë thirrje për largimin e qeverisë Rama. Një protestuese tha se është momenti për të kthyer fëmijët nga emigracioni, ndërsa i drejtoi një mesazh kryeministrit duke u shprehur se diaspora s’do të vijë për pushime, por për protestë.

“Është koha të kthejmë fëmijët tanë nga emigracioni! Shqipëria u takon vetëm atyre! Fëmijët tanë duhet të kthehen në Shqipëri! Për të gjithë ata që thonë pse jemi mbledhur, të gjithë ne e kemi një hall. Boll është boll! Z. Kryeministër, kam një lajm për ty: diaspora këtë radhë nuk do të vijë për pushime, por do të vijë në protestë! Falënderim i veçantë për të gjithë ata që kanë ardhur nga larg, por edhe për të gjithë shqiptarët anë e mbanë botës që po bëjnë protesta. Boll është boll!”, tha ajo duke iu bashkuar thirrjeve “Rama në burg, Berisha në burg!”, tha ajo.

P.J/Shqiptarja.com