Fiskalizimi, Biznesi i vogël:Duhet por nuk jemi gati! Agolli: Pagesat online ulin informalitetin

9 Korrik 2021, 09:05 | Përditesimi: 9 Korrik 2021, 09:05

Biznesi i vogël në vend kërkon nga qeveria që të shqyrtoj edhe një herë mundësinë e shtyrjes së përkohshme të fazës së tretë të fiskalizimit që pritet të nisë në 1 shtator për transaksionet me para në dorë biznes-konsumator. Kryetari i Shoqatës së Biznesit të Vogël Shpëtim Agolli tha në konferencë për mediat se bizneset e vogla nuk kanë njohuritë e mjaftueshme për të implementuar këtë proces.“Meqenëse se ekonomia, por sidomos biznesi i vogël kaloi një krizë të madhe si pasojë e pandemisë, ne kemi kërkuar shtyrjen e kësaj reforme fiskale. Ne nuk jemi kundër inovacionit por sa është e mundur që ky proces të eci sipas parashikimeve? Kemi kërkuar shtyrjen e afatit për shkak se nuk kishim njohuri të këtij sistemi. Mos harroni që biznesi i vogël ka edhe mangësi, ka biznese që drejtohen nga njerëz jo me aftësi të madhe intelektuale”, u shpreh Agolli. Por Agolli thotë se fiskalizimi është i nevojshme pasi ul informalitetin në ekonomi. “Në treg kanë hyrë disa kompani kjo është gjë e mirë sepse e rrit konkurrencën. Ne mendojmë që çdo teknologji e re është më e mirë por problemi është sa të përgatitur jemi. Fiskalizimi pritet të ulë evazionin fiskal se shumica e pagesave do të bëhet online”, tha kreu i shoqatës së Biznesit të Vogël. Faza e parë e fiskalizimit nisi në 1 janar të këtij viti për transaksionet biznes-shtet dhe faza e dytë nisi në 1 korrik për transaksionet pa para në dorë biznes-biznes. Ndërkohë për të mbështetur bizneset dhe për të mos i ndëshkuar ato në që nisje të kësaj reforme, nëpërmjet një akti normativ qeveria vendosi të mos aplikojë gjoba deri në fund të këtij viti.

r.k./Shqiptarja.com