Deborah Keçi vjen në një rrëfim ndryshe, përtej figurës publike dhe përtej asaj që publiku njeh prej saj. E vetmja shqiptare që merr pjesë në garat prestigjioze dhe tepër të vështira "Ironman", ajo rrëfen eksperiencën e jashtëzakonshme dhe sfiduese të një prej garave më të vështira të qëndrueshmërisë fizike në botë duke prekur 3 displinat: not, ciklizëm dhe vrap për 11 orë pa pushim. Gjashtë muaj stërvitje intensive, sakrifica, disiplinë dhe përballje me limitet e trupit dhe mendjes. Por Deborah nuk sfidon veten vetëm në sport. Pasioni për udhëtimet e ka çuar në vende dhe eksperienca që kanë ndryshuar mënyrën e saj të të menduarit. Nga ngjitja në Kilimanjaro, deri te jeta dhe eksperiencat e saj në Afrikë, ajo zbuloi një të vërtetë të thjeshtë, por të fuqishme: se bollëku dhe pasuria materiale nuk na bëjnë domosdoshmërisht më të lumtur. Në këtë intervistë në “Rreze Dielli” Deborah ndalet edhe te vështirësitë personale dhe momentet e jetës që e kanë vënë përballë sfidave të mëdha. Sporti, sipas saj, nuk ka qenë vetëm një mënyrë jetese, por një forcë që e ka ndihmuar të përballojë periudhat më të vështira, të gjejë ekuilibër dhe të rizbulojë fuqinë brenda vetes.