TIRANE - Me 82 vota pro, 13 kundër, 5 abstenim, dhe 5 që nuk votuan, parlamenti i Shqipërisë kaloi paketën Anti-Shpifje. Paketa pësoi disa ndryshime, mes të cilave një rritje të gjobave për portalet dhe ato nuk do të mbyllen pa vendim gjykate.
Me dhjetëra gazetarë këtë të mërkurë u ngritën në protestë para Kuvendit për të kërkuar tërheqjen e qeverisë nga paketa anti-shpifje që më shumë sesa rregullim për herë të parë me ligj të portaleve, cënon lirinë e shprehjes. Brenda Kuvendit, kryeministri Edi Rama në një fjalë të gjatë në mbrojtje të këtij drafti që ka 1 vit që është hartuar, edhe pse diskutimet e rralla nuk kanë qenë të frytshme, me ironi i quajti gazetarë heronj, teksa në të vërtetë i etiketoi ata si shkelës së të drejtave të qytetarëve. Kreu i qeverisë nuk u ndal konkretisht në shqetësimin më të madh të komunitetit të gazetarëve dhe instancave ndërkombëtare, që është kthimi i AMA-s, një organizëm i kushtëzuar nga shumica në pushtet, në gjykatë të gazetarëve. Rama u ndal sipërfaqësisht, duke thënë se në rastet e shpifjeve vendimmarrja nuk do të jetë e Këshillit të Ankesave apo Bordit (dy institucioneve në varësi të AMA-s, me gazetarë dhe juristë), por gjykatës. Por shpifja nuk është shqetësimi i parë i gazetarëve. Ky ligj i jep të drejtën AMA-s që me gjykimin e vetëm këtij institucioni, të urdhërojë AKEP-in të mbyllë një portal, pa pasur nevojë për një vendim gjykate. Nëse brenda 60 minutave nga urdhri, një portal refuzon të heqë një përmbajtje që i përkasin tre argumenteve: pornografi me fëmijë, nxitje e terrorizmit dhe kërcënim ndaj sigurisë kombëtar, portali mbyllet.
Shefi i mazhorancës dha shembullin e vendeve të ndryshme në botë me kod penal, pra që e dënojnë shpifjen me burg, dhe me masa administrative (gjoba) mjaft të larta, por tha se ishin pikërisht ndërkombëtarët (BE, OSBE dhe Këshilli i Evropës) që kërkuan të mos merren për shembuj këto modele kaq të ashpra. Madje tha se në SHBA, Byroja e Hetimit, e mbyll portalin pa vendim gjykate. Në fakt, edhe në Shqipëri në paketën që ka shumë konfuzion, pritet që pushtetin e mbylljes së një portali, ta ketë pikërisht AMA, dhe gjykimi nëse një shkrim është cënues për fëmijët, nxit terrorizëm e cënon sigurinë kombëtare, t'i lihet në dorë këtij institucioni.
Kryeministri Rama u shpreh i qartë për veprimin e pritshëm të presidentit Ilir Meta, për ta kthyer pas në Kuvend për rishqyrtim ligjin anti-shpifje, por tha se pas janarit qytetarët do të kenë mundësi të jënë të mbrojtur me ligj ndaj abuzimeve që mund t'u bëhen përmes shkrimeve në portale. Për kreun e qeverisë, ligji është 100 % i dakordësuar me rekomandimet e OSBE-së.