Në një botë ku ritmi i jetës shpesh na largon nga ndjeshmëria dhe magjia e fëmijërisë, ka ende njerëz që dinë ta përkëdhelin shpirtin me përralla, ninulla dhe dashuri të pastër. Të qëndrosh pranë fëmijëve në çdo etapë të jetës nuk është e lehtë, por për Suela Brahimllari kjo është kthyer në mision, frymëzim dhe mënyrë jetese. Me origjinë nga Korça dhe e rritur në Fier, ajo transmeton një energji të rrallë, që buron nga shpirti dhe dashuria për familjen. Përkëdhelitë, ninullat dhe frazat e ëmbla të fëmijëve, Suela i ka kthyer në identitet dhe frymëzim për krijimtarinë e saj. Gjithçka nisi në vitin 2013, me krijimin e një kapeleje të thjeshtë, një gjest bamirësie që më pas u shndërrua në një sipërmarrje të dedikuar plotësisht botës së fëmijëve. Që nga ai moment, ajo nuk u ndal më, duke ndërtuar hap pas hapi një ëndërr të madhe, të mbushur me sakrifica, pasion dhe shumë dashuri. Sot, në studion e “Rreze Dielli”, së bashku me tre vajzat e saj, Anabel, Evelin dhe Venera, Suela rrëfen rrugëtimin e saj të veçantë: nga profesioni i inxhinieres drejt realizimit të ëndrrës si stiliste, sfidat e një nëne si edhe fuqinë që të jep besimi për të ndjekur zemrën. Një histori frymëzuese që mbi të gjitha flet për dashurinë, atë më të pastrën, dashurinë për fëmijët.