Ndalemi sot tek një event tepër i veçantë, një moment që ngjall emocione të forta për secilin prej nesh, diplomimi. Ceremonia që për shumë njerëz mbetet një kujtim i paharrueshëm, një përmbyllje e bukur e viteve të përpjekjeve, ëndrrave dhe sakrificave. Por sot do të flasim për disa vajza të jashtëzakonshme, të cilat e kanë bërë këtë ditë edhe më të veçantë. Me ne në "Rreze Dielli" janë Arjola Koçi, Alisa Sinameta dhe Marinela Cahani Muça, tre nëna të reja që kanë ndarë momentin e diplomimit me fëmijët e tyre të vegjël, duke e kthyer ceremoninë e parakalimit në një çast plot dashuri, emocione dhe krenari. Në këtë bisedë do të zbulojmë atmosferën e bukur të atij momenti unik, por edhe sfidat, lodhjen dhe sakrificat që këto “studente-nëna” kanë përjetuar ndër vite, duke ndjekur njëkohësisht rrugëtimin e dijes dhe të mëmësisë.