SHBA paketë e re ndihme afatgjatë për Ukrainën, 1 miliardë vetëm për mbrojtjen ajrore dhe artilerinë

Pas miratimit nga Kongresi amerikan këtë javë të paketës së ndihmës prej 61 miliardë dollarë në mbështetje të Ukrainës, mediat amerikane raportojnë se qeveria e SHBA po planifikon një paketë të re të ndihmës ushtarake me vlerë miliarda dollarë që Kievi të mbrohet kundër pushtimit rus.

SHBA-ja po përgatitet të nënshkruajë një paketë të ndihmës ushtarake afatgjatë prej 6 miliardë dollarësh. Kësti do të jetë pjesë e ndihmës ushtarake prej 61 miliardë dollarësh të miratuar nga Kongresi. Sipas raportit, planet do të bëhen publike gjatë një takimi virtual të grupit të kontaktit të udhëhequr nga SHBA-ja për të mbështetur Ukrainën.

Gazeta amerikane “Politico” thotë se kjo nuk pritet të jetë një ndihmë e menjëhershme. Presidenti Joe Biden njoftoi për paketën e re dhe të menjëhershme ushtarake për Ukrainën që arrin në 1 miliard dollarë.

Kjo përfshin kryesisht pajisje për mbrojtjen ajrore, artileri, sisteme raketore dhe automjete të blinduara nga stoqet e ushtrisë amerikane. Dy përfaqësues të qeverisë amerikane raportuan se 6 miliardë dollarët përfshijnë kontrata që do t’u jepen kompanive amerikane të mbrojtjes për të ndërtuar pajisje të reja për Ukrainën si pjesë e një programi financimi të SHBA-së.

Sipas Politico, blerjet me vlerë 6 miliardë dollarë do të bëhen nga industritë ushtarake amerikane dhe do të jenë artikuj të rinj, që do të thotë se ato nuk do të arrijnë në duart e ushtrisë ukrainase për disa vite.

Ndihma ushtarake amerikane për Ukrainën që kur ushtria ruse pushtoi territorin e saj në shkurt 2022 vlerësohet të ketë arritur në 45 miliardë dollarë.

G.K/Shqiptarja.com

TAG:
• SHBA
• Joe Biden
• lufta ne ukraine
• Volodymyr Zelensky