Politikë

Menjëherë pas marrjes së detyrës së qeverisë së re, kanë ardhur edhe urimet nga ndërkombëtarët. Ambasadorja e SHBA, Yuri Kim uroi kryeministrin Edi Rama, ku tha se pret të bashkëpunojë me qeverinë për të forcuar demokracinë, drejtësinë dhe biznesin. Ambasadori i BE, Luigi Soreca vuri theksin te Integrimi, ku tha se shpreson që kjo çështje të jetë edhe fokusi në programin e qeverisë.

Ambasadori i BE, Luigi Soreca ka uruar kryeministrin Edi Rama për marrjen e detyrës dhe krijimin e qeverisë së re, ndërsa shprehet se pret që integrimi në BE dhe reformat e ndërlidhura me të, përfshirë sundimin e ligjit, të jenë pikat kryesore të agjendës. Me një postim në Twitter, Soreca thotë se koordinimi i fortë institucional, është çelësi për hyrjen në BE.

Krijimi i një Agjencie për Mediat dhe Informimin është një ndër vendimet e para që u morën sot nga qeveria 'Rama 3'. Në vendimin e publikuar në faqen zyrtare të Kryeministrisë jepet e gjithë mënyra se si do të funksionojë kjo Agjenci. 

Forcat e Armatosura të vendit do të kenë një Njësi Speciale të kampionëve. Këtë ka deklaruar Kryeministri Rama në mbledhjen e parë të Qeverisë teksa ka prezantuar vendimin për "Për punësimin në strukturat e Ministrisë së Mbrojtjes së sportistëve, që përfaqësuan denjësisht kombin shqiptar me rezultatet e tyre në Lojërat Olimpike 2020", pra të kampioneve olimpike Nora GJakova dhe D'Istrja Krasniqi.

Kryeministri Edi Rama dhe ministrat e kabinetit të ri janë betuar sot te Presidenti Meta, për të nisur punën për mandatin e tretë qeverisës. Menjëherë pas betimit, Rama nuk ka humbur kohë, duke zhvilluar në kryeministri mbledhjen e parë të qeverisë së re.

Një vendim i Ministrisë së Shëndetësisë për të ndaluar grumbullimet deri më 20 shtator si pjesë e masave anti-Covid për të shmangur rritjen e infektimeve, është perceptuar nga media e familjes Berisha si frikë e kryeministrit Rama nga tubimet e Berishës.

Avokati Spartak Ngjela tha në Report Tv se Berisha e ka të pamundur të rrëzojë Bashën dhe aq më pak me referendum pasi nuk e lejon statuti i PD. Ngjela tha se Basha është zgjedhur me parimin “një anëtarë, një votë” dhe se sulmet e Berishës se do ngrejë demokratët kundër Bashës nuk pinë ujë por shërbejnë vetëm për të krijuar pështjellim shoqëror. Në lidhje me takimet e shpeshta që ambasadorja Yuri Kim ka bërë me SPAK, për Ngjelën janë paralajmërime për ish liderin e PD-së për proces penal për korrupsion.

Tirana kryeqyteti digjital i Ballkanit, është jo vetëm një ambicie, por objektiv i qartë i kryetarit të Bashkisë Erion Veliaj. Duke listuar disa nga vendimet që shkojnë në funksion të këtij qëllimi, ku më i rëndësishmi është shndërrimi i Piramidës në qendrën më të madhe të teknologjisë në Ballkan, por dhe hapja për herë të parë e disa shkollave elitë të teknologjisë si “Holberton”, kryebashkiaku Veliaj tha se fokusi drejt Tiranës 2050 është industria kreative.