Politikë

Përfaqësuesi i Lartë i Politikës së Jashtme, Josep Borrell dhe Komisioneri për Zgjerimin, Olivér Várhelyi i cilësuan zgjedhjet parlamentare të 25 prillit si të mirëorganizuara nga KQZ dhe gjithëpërfshirëse. BE bën thirrje palët politike të respektojnë dhe njohin rezultatin e zgjedhjeve dhe se çdo pretendim për blerje vote duhet të adresohen në KQZ në mënyrë qw rastet të heton plotësisht.

Partia Socialiste e fitoi Vlorën me  8 mandate, kundrejt 4 të Partisë Demokratike. Përmes një konference për shtyp nga Vlora Gjiknuri falënderoi mbështetësit por pati një mesazh edhe për Metën. 

Drejtuesi politik i qarkut të Korçës, Niko Peleshi u shpreh i lumtur me fitoren e PS duke marrë 6 mandate.

Fjalimi i fitores së Edi Ramës, si kryeministri i parë në histori që fitoi 3 mandate radhazi, kishte një fokus kryesor, atë të zhdukjes së ndasive politike mes socialistëve dhe demokratëve në emër të gjithë shqiptarëve! Për këtë, ai tha se do të jetë kryeministri i të gjithë shqiptarëve dhe i shtriu dorën e bashkëpunimin PD-së, pa përmendur në asnjë moment LSI. Në kundërshtim nga Basha, Rama vlerësoi maksimalisht kundërshtarin. Ai pati një ftesë për kryedemokratin, që të pranonte me dinjitet humbjen, pasi “bëri sa mundej”.

Kandidati për deputet i PS-së i renditur i katërti në Qarkun e Beratit, Nasip Naço ka thënë se sot gjendet bashkë me PS për shkak të eksperimenteve të dështuara të LSI-së, ndërsa shton se kjo e fundit "ishte bërë si guri në këpucë".

Vangjel Tavo, i pari në listën e LSI në Gjirokastër, ka reaguar pasi kjo forcë nuk mundi të sigurojë as edhe një mandat në këtë qark. Me një postim në Facebook, Tavo pranon humbjen ndërsa thotë se garoi në kushte të pabarabarta.

Drejtuesi politik i PS në qarkun e Tiranës dhe njëherazi kreu i Bashkisë, bën me dije se socialistët kanë fituar në njësinë numër 1. Në një deklaratë për mediat, Veliaj tha se PS ka fituar me 52.4% dhe se ka marrë më shumë vota se të gjitha forcat e tjera politike së bashku.

Teksa janë numëruar deri tani mbi 90% e votave duket se Partia Socialiste po shkon drejt fitores historike të mandatit të tretë qeverisës. Deri tani PS ka fituar me 48.68% të votave ose 73 mandate deputetësh. PD ka marrë 39.39% të votave ose 59 mandate.

Berati i ka besuar socialistëve numrin më të madh të mandateve duke i dhënë asaj 5 deputet nga ky qark, ndërsa PD ka marrë 2 mandate. Aty ku shpresonte të merrte të pakën 2 mandatet e fituara në 2017, LSI është zhdukur totalisht nga ky qark duke mos marrë asnjë mandat. 

Kur janë numëruar 89% e votave, ku PS është në avantazh, kryeministri Edi Rama ka reaguar me një mesazh të veçantë në Facebook. Ai uron mirmëngjes me një thënie të basketbollistit Michael Jordan, ndërsa shkruan: "Po punove fort ia del. S'ka rrugë të shkurtra në jetë".

Në Partinë Socialiste, ka shpërthyer festa! Edhe pse numërimi i votave nuk ka përfunduar ende zyrtarisht, disa kandidatë kanë arritur që të cekin finishin, pas një gare të lodhshme dhe sfilitëse të ketë qenë ajo. Festa e socialistëve ka një emërues të përbashkët, puthje, përqafime dhe shumë duartrokitje nga të pranishmit në KZAZ.

Me duartrokitje, puthje dhe përqafime! Kështu e priti ministri Bledi Çuçi përfundimin e numërimit të votave në qarkun e Gjirokastrës. Ai ishte renditur në vendin e 3 të listës, që përkonte me kufirin maksimal që PS kërkonte të merrte në këtë qark dhe ia doli të fitonte. Ai ka publikuar video nga ky moment i triumfit, së bashku me një mesazh për votuesit.

Partia Socialiste dhe ajo Demokrate duket se kanë bërë paqe në qarkun e Vlorës. Socialistët kanë marrë 52.56 % të votave e ndërsa demokratët 33.84 %, e përkthyer në mandate , 8 me 4.

Në Shqipëri, që prej natës së mbrëmshme ka nisur numërimi i votave për parlamentin e ri të vendit. Ndërsa ka përfunduar procesi për gati 68 përqind të qendrave të votimit, rezultati i deritanishëm jep fituese Partinë socialite të Kryeministrit Edi Rama. Nëse do të konfirmohet, ai do të marrë mandatin e tretë, duke shënuar kështu një rekord që nuk e ka arritur askush më parë, që nga vendosja e pluralizimit politik. Por nga ana e saj dhe Partia Demokratike shprehet e bindur se me pjesën e mbetur të kutive, fitorja do t’i buzëqeshë asaj.