Kompania shtetërore që menaxhon trafikun ajror “Albcontrol” nuk do të ketë më aksione tek Air Albania. Me vendim të Këshillit të Ministrave është vendosur që aksionet të kalojnë tek Ministria e Ekonomisë.

“Kuotat e kapitalit, në masën 10% (dhjetë për qind), që zotërohen nga shoqëria “Albcontrol”, sh.a., në shoqërinë “Air Albania” sh.p.k., transferohen tek Ministria e Ekonomisë dhe Inovacionit. Ministria e Ekonomisë dhe Inovacionit, me transferimin e kuotave, sipas pikës 1, të këtij vendimi, ushtron të gjitha të drejtat dhe detyrimet, që rrjedhin nga cilësia e ortakut në shoqërinë “Air Albania” sh.p.k. Ngarkohen Ministria e Ekonomisë dhe Inovacionit dhe shoqëria “Albcontrol” sh.a. për zbatimin e këtij vendimi. Ky vendim hyn në fuqi pas botimit në Fletoren Zyrtare”, thuhet në vendimin e qeverisë që tanimë është në fuqi.

Air Albania është themeluar më 12/09/2018, dhe kishte si aksionerë Turkish Airlines 49.1% të aksioneve, 41% MDN Investment dhe pjesa prej 10% ishin të Albcontrol, por tashmë i kalojnë Ministrisë së Ekonomisë dhe Inovacionit.

Ndërkohë më 19 nëntor të vitit të kaluar kompania turke, ‘Turkish Airlines’ njofoi se kishte vendosur të shiste aksionet e saj prej 49%.