111 vjet nga lindja e Nënë Terezës, Rama: Ju uroj një ditë të paqtë si vetë ajo! Xhaçka: Krenar që solidariteti që ajo predikoi është prezente mes nesh

Presidenti Ilir Meta ka përkujtuar ditëlindjen e shenjtores Nënë Tereza. Përmes disa rreshtave në ‘Facebook’, Meta shkruan se nderimi më i madh që mund t’i bëjmë bamirëses shqiptare është të ndjekim shembullin e saj dhe të përcjellim vlerat hyjnore që ajo ka promovuar.

“Dashuria duhet vënë në veprim", predikonte Shenjtorja Nënë Tereza, simboli më përfaqësues dhe frymëzues i humanizmit, solidaritetit dhe i vajzës, motrës dhe nënës së dhembshur shqiptare. Sot, në 111-vjetorin e lindjes së saj, nderimi më i madh që mund t’i bëjmë është të ndjekim shembullin e veprës së saj dhe vlerat më të mira kombëtare, njerëzore dhe hyjnore që promovoi gjatë gjithë angazhimit jetësor. Jo të gjithë ne mund të bëjmë gjëra të mëdha, por secili nga ne mund të bëjë gjëra të vogla me dashuri të madhe”, shkruan Meta.

Ministrja e Jashtme, Olta Xhaçka i ka dedikuar disa fjalë bamirësisë së Nënë Terezës në 111 vjetori e lindjes së saj. Duke vendosur një paralele me situatën e sotme në Afganistan, ku Shqipëria po përgatitet të prej me mijëra afganë, Xhaçka shprehet se është e krenare që vlerat e solidaritet të Nënë Terezës janë të pranishme mes shqiptarëve edhe sot.

"111 vite më parë, një grua e veçantë lindi, një grua e cila vendosi t’ia dedikoje jetën e saj kujdesit për njerëzit. Sot, kur Shqipëria po përgatitet të mirëpresë mijëra njerëz të cilët po arratisen pasi jeta e tyre po kërcënohet, ne jemi krenarë që solidariteti dhe bamirësia për të cilën ajo predikoi dhe praktikoi gjatë gjithë  jetës, është e pranishme mes shqiptarëve. Gëzuar ditëlindjen Nënë Tereza', shkruan Xhaçka.