120 minuta 'betejë' në 'Bernabeu', River Plate fiton finalen e Copa Libertatores përballë Boca Juniors (VIDEO)

SPANJË - River Plate ka përmbysur gjithçka në fund të kohësh shtesë duke fituar Copa Libertadores me rezultatin 3-1. Pas një historie të gjatë dhune, pezullimesh dhe qindra polemikave, ndeshja e kthimit të finales së Copa Libertadores u zhvillua në Santiago Bernabeu të Madridid dhe ishte River ekipi që ka dalë triumfues në kohën shtesë.

VIDEO/Përmbledhje e ndeshjes mes River Plate dhe Boca Juniors

Dy minuta pasi kishte filluar koha shtesë Boca pëson një goditje të rëndë, Wilmar Barros ka marrë kartonin e dytë të verdhë dhe arbitri i tregoi kartonin e kuq duke lënë shokët e ekipit në inferioritet numerik. Gjithsesi River nuk arrin ta shfrytëzojë siç duhet situatën dhe nuk arrin të gjejë hapësira në zonën kundërshtare. Por një gol fantastik nga jashtë zonës i Quintero-s në minutën e 109’ ka përmbysur gjithçka. Çfarë perle nga kolumbiani! Boca megjithëse me 10 lojtarë ushtron presion në minutat e fundit duke kërkuar golin e barazimit, por fati nuk ishte me ta teksa në fund të takimit shtylla i mohon golin e merituar për shpirtin e garës që ka treguar. Në fund, pasi portieri kishte dalë për ndihmuar shokët e ekipit në një goditje këndi, River shënon golin e tretë me portën e boshatisur me anë të Martinez.Sfida nis me një shpirt agresiv nga të dy krahët, faulle të shumtë dhe ndalesa loje. Tensioni duket që është i lartë, por prapëseprapë ka momente të bukura dhe i pari erdhi në minutën e 11’ kur Perez i Boca-s humb një mundësi të artë dhe kjo për meritë të portierit Armani. Ishte përsëri Perez që pas gjysmë ore lojë shpërdoron një tjetër mundësi teksa goditja e tij përfundon jashtë fushe. Por në minutën e 44’ të pjesës së parë erdhi goli i Boca-s.  

Ishte Dario Benedetto ai që me shumë klas ka kaluar të tijtë në avantazh pas një pasimi spektakolar të Nandez. Një gol i merituar i Boca-s pak sekonda përpara fundit të pjesës së parë. Pas pushimit është një tjetër River dhe në minutën e 56’ nuk i akordohet një penallti e pastër pas përplasjes së portierit me Fernandez. Gjithsesi ishte pikërisht Ignacio Fernandez ai që barazoi gjithçka në minutën e 68’ me një goditje të bukur nga brenda zonës.

Ndeshja është e hapur me aksione të shpejtë nga të dy krahët. Boca vazhdon të sulmojë dhe në minutën e 79’ ka një mundësi të mirë nga një goditje me dy takime nga brenda zonës kundërshtare, por muri bllokon gjuajtjen. Ritmi ra disi në minutat e fundit. Ekipet kanë bërë llogaritjet e tyre teksa do të luhen 30 minuta kohë shtesë për të vendosur se kush do të fitojë Copa-n.

/b.ha./Shqiptarja.com

TAG:
• boca juniors
• river plate
• Kupa Libertadore