21 janari, Braçe: Dënim për ata
që qëlluan mbi turmën

TIRANË – Deputeti socialist Erion Braçe ka reaguar pas vendimit të prokurorisë për të dorëzuar në prokurori dosjen me 4 të pandehur për vrasjet e 21 janarit 2011.
“Mirë Prendi e Llupo vranë tre protestues, po këta 10 të tjerët që dolën të pafajshëm a qëlluan ndaj protestuesve? Se s'vranë s’janë pa faj!”, shkruan Braçe në profilin e tij në Facebook.


DOSJA E PROKURORISË
Prokuroria njoftoi dje se ndaj shtetasit Ndrea Prendi, me detyrë komandant i Gardës së Republikës, u ngrit akuza për veprën penale “Vrasja në rrethana të tjera cilësuese”, parashikuar nga neni 79, gërma “ë” i Kodit Penal.

Ndaj shtetasit Agim Llupo, me detyrë shef i shtabit të Njësisë Speciale në Gardën e Republikës, u ngrit akuza për veprën penale “Vrasja në rrethana të tjera cilësuese”, parashikuar nga neni 79, gërma “dh” i Kodit Penal.

Ndaj shtetasit Margarit Kume, me detyrë shofer i komandantit të Gardës së Republikës, u ngrit akuza për veprën penale “Veprime që pengojnë zbulimin e së vërtetës”, parashikuar nga neni 301 i Kodit Penal.

Ndaj shtetasit Armando Kasaj, me detyrë specialist i “IT” në Këshillin e Ministrave”, u ngrit akuza për veprën penale “Veprime që pengojnë zbulimin e së vërtetës”, parashikuar nga neni 301 i Kodit Penal.

Hetimet në ngarkim të efektivave të Gardës së Republikës, shtetasve Dashamir Shehi, Alfred Ahmetcenaj, Altin Kollçinaku, Fatos Bushati, Aleksandër Deda, Agrom Malaj, Gazmen Ahmetaj, Sadik Çela dhe Mark Nikolli, u pushuan në datën 20.04.2012, njoftoi Prokuroria.

Sipas të njëjtit burim, hetimet vazhdojnë në lidhje me përcaktimin e autorësisë për vrasjen e shtetasit Aleks Nika dhe plagosjen e demonstruesve të quajtur Artes Dybeli, Ilia Qesko dhe Ilia Papa.

(aq/im/shqiptarja.com)