50-100 euro në zarf për të kaluar kufirin edhe pse s'lejohet/ Pranga dy personave në Rinas, tentuan të korruptonin punonjësin e Rinasit (VIDEO)

TIRANË- Kufijtë janë të bllokuar për një kategori të caktuar njerëzit, por kjo nuk i ka penguar shqiptarët që të bëjnë tentativa të ndryshme për të shkuar në shtete të caktuara të Europës.

Dy prej tyre, edhe pse nuk bënin pjesë në kategorinë e lejuar, janë nisur drejt Rinasit dhe kanë tentuar që të korruptojnë punonjësit, por nuk ia ka dalë mbanë.

Një prej tyre i ka dhënë punonjësit të kufirit 50 euro për ta lejuar, e ndërsa një tjetër i cili ishte me bashkëshorten 100 euro. Për pasojë, janë vënë në prangat e policisë. Në pranga kanë rënë A. M., 41 vjeç, banues në Tiranë dhe Q. M., 56 vjeç, banues në Divjakë.

Njoftimi i policisë
Intensifikohen kontrollet për përmbushjen e kushteve për të udhëtuar në vendet e BE-së. Kontrollet për parandalimin dhe goditjen e paligjshmërisë në fushën e falsifikimit të dokumenteve, me qëllim udhëtimin për të kërkuar azil.

Policia Kufitare e Rinasit, brenda pak orësh godet dy raste të mitëdhënies. Tentuan të korruptonin punonjësit e Policisë Kufitare, me qëllim lejimin për të udhëtuar drejt vendeve të BE-së edhe pse nuk plotësonin kushtet, vihen në pranga dy shtetas. Shërbimet e Policisë Kufitare në Rinas, në zbatim të masave parandaluese për moslejimin e udhëtimit drejt vendeve të BE-së të atyre shtetasve që nuk plotësojnë kushtet për të lëvizur në hapësirën Schengen, arrestuan në flagrancë, për veprën penale “Korrupsioni aktiv i personave që ushtrojnë funksione publike”, shtetasit:

A. M., 41 vjeç, banues në Tiranë;

Q. M., 56 vjeç, banues në Divjakë.

Arrestimi i tyre u bë pasi gjatë kontrollit të dokumentacionit dhe intervisitimit për qëllimin e udhëtimit në vendet e BE-së, këta shtetas nuk justifikonin qëllimin e lëvizjes dhe nuk plotësonin kushtet për të udhëtuar në hapsirën Schengen. Shtetasi A.M. i ka ofruar punonjësit të Policisë Kufitare 50 euro, ndërsa disa orë më vonë shtetasi Q. M., i cili donte të udhëtonte bashkë me bashkëshorten, i ka ofruar punonjësit të Policisë Kufitare 100 euro, me qëllim lejimin e kalimit.

Policia Kufitare apelon për të gjithë shtetasit që duan të udhëtojnë drejt vendeve të BE-së, që në rast se nuk plotësojnë kushtet për të lëvizur në hapësirën Schengen të mos ndërrmarin asnjë veprim të kundërligjshëm, pasi do përballen me ligjin.

B.K./Shqiptarja.com

TAG:
• rinas
• policia e tiranes
• arrestohet