​E pabesueshme, italianët
me gomone drejt Shqipërisë

Shqipëria, toka e premtuar! Jo në realitet, por në ekranin e kinemasë. Më 3 shkurt do të shfaqet në kinematë italiane filmi “Vista Mare” i regjisorit Andrea Castoldi.
 
Italia e prezantuar nga “Vista Mare” është një vend në krizë, ku ka revolta popullore dhe manifestime për shkak të kushteve ekonomike përherë e më të këqija, nga të cilat tentohet arratia për të mbërritur në Shqipërinë e shumë-ëndërruar, tokë e begatë me punë e shpresa.  
 
Kriza dhe emigracioni, dëshira për të ndryshuar dhe shpresa janë temat kryesore të filmit, i cili zgjedh të përballet me aktualitetin me anë të një provokimi: vënien në skenë të paradoksit ku refugjatët janë italianë dhe toka e premtuar është bregu shqiptar.
 
Protagonisti i filmit është Stilitano, i interpretuar nga Arturo Di Tullio, anti-heroi që tenton të rregullojë gjërat në mënyrën e duhur, por gabon, një lloj Pinoku i ditëve tona.
 
Nga veriu niset drejt Puglias, rajoni kufitar i militarizuar, i vendosur të braktisë vendin e të fillojë një jetë të re. Në pyjet e Umbrias bashkohet me një grup italianësh, të fshehur prej javësh në një shtëpi të braktisur, të cilët, ashtu si ai, presin rastin për t’i hipur gomones fatlume.