Shoqëria MABCO Constructions S.A. ka reaguar ndaj ultimatumit të Ministrisë së Infrastrukturës dhe Energjisë për zgjidhjen brenda 30 ditësh të konfliktit mes ortakëve të Aeroportit Ndërkombëtar të Vlorës, duke deklaruar se është e gatshme të marrë pjesë në çdo proces dialogu apo ndërmjetësimi, por duke theksuar se çdo diskutim duhet të nisë nga zbatimi i vendimit të fundit të Gjykatës së Lartë.

Në një deklaratë publike, MABCO shprehet se mirëpret çdo iniciativë institucionale që synon rikthimin e normalitetit në funksionimin e shoqërisë koncesionare dhe përfundimin e projektit të aeroportit, të cilin e konsideron me rëndësi strategjike për vendin.

DEKLARATA E MABCO:

Në lidhje me shkresën e Ministrisë së Infrastrukturës dhe Energjisë nr. 4628 prot., datë 29.05.2026

MABCO Constructions S.A. ka marrë dijeni për përmbajtjen e shkresës së Ministrisë së Infrastrukturës dhe Energjisë nr. 4628 prot., datë 29.05.2026, lidhur me situatën në projektin e Aeroportit Ndërkombëtar të Vlorës.

MABCO mirëpret çdo iniciativë institucionale që synon rikthimin e normalitetit në funksionimin e shoqërisë koncesionare dhe përfundimin sa më të shpejtë të një projekti me rëndësi strategjike për Republikën e Shqipërisë.

Së pari, është e rëndësishme të theksohet se me vendimin e fundit të Gjykatës së Lartë janë rrëzuar masat e sigurimit që kishin kufizuar ushtrimin e të drejtave të MABCO-s si ortak mazhoritar i shoqërisë koncesionare VIA sh.p.k.

Ky vendim ka rikthyer situatën juridike në përputhje me statusin ligjor dhe korporativ të palëve dhe përbën bazën mbi të cilën duhet të ndërtohet çdo proces i mëtejshëm institucional. MABCO mbetet ortaku mazhoritar i VIA-s me 98% të kuotave, sipas të dhënave të regjistruara dhe të vlefshme ligjërisht. Çështjet e tjera që lidhen me pretendime mbi strukturën e pronësisë janë objekt i proceseve gjyqësore në vijim dhe do të trajtohen nga organet kompetente. Gjatë periudhës Tetor 2025 – Maj 2026, MABCO ka ngritur në mënyrë të vazhdueshme shqetësime pranë institucioneve shtetërore lidhur me kufizimin e ushtrimit të të drejtave të saj si ortak mazhoritar dhe pasojat që kjo situatë mund të sillte për ecurinë e projektit. Në këtë kuadër, MABCO ka depozituar dhjetëra shkresa dhe kërkesa zyrtare, me qëllim mbrojtjen e interesit të projektit dhe shmangien e vonesave të mëtejshme. Pas vendimit të Gjykatës së Lartë, prioriteti ynë nuk është rikthimi në debatet e së kaluarës, por rikthimi i funksionimit normal të shoqërisë koncesionare dhe përshpejtimi i të gjitha proceseve që lidhen me përfundimin, testimin, certifikimin dhe vënien në operim të aeroportit.

Në këtë kuadër, MABCO ka ndërmarrë hapat e nevojshëm për rikthimin e normalitetit korporativ në VIA, përfshirë thirrjen e organeve vendimmarrëse të shoqërisë në përputhje me statutin dhe legjislacionin shqiptar në fuqi. MABCO shpreh gatishmërinë e plotë për të marrë pjesë në çdo proces dialogu, koordinimi apo ndërmjetësimi të iniciuar nga Ministria e Infrastrukturës dhe Energjisë, me qëllim adresimin e çështjeve të mbetura pezull dhe garantimin e vijimit normal të projektit. Megjithatë, MABCO vlerëson se çdo proces i tillë duhet të mbështetet mbi disa parime themelore:

1) respektimin e plotë të vendimit të Gjykatës së Lartë dhe të të drejtave që burojnë prej tij;

garantimin e aksesit të plotë dhe të pakufizuar të përfaqësuesve, specialistëve, punonjësve dhe nënkontraktorëve të MABCO-s në projekt;

2) mundësimin e aksesit në informacionin teknik, administrativ dhe financiar të nevojshëm për vlerësimin e gjendjes aktuale të projektit;

3) zhvillimin e proceseve të mëtejshme në përputhje me Kontratën e Koncesionit, statutin e VIA-s dhe legjislacionin shqiptar.

MABCO thekson se çdo vlerësim mbi afatet, detyrimet apo pasojat e periudhës gjatë së cilës ushtrimi i të drejtave të saj ka qenë i kufizuar duhet të bëhet në mënyrë objektive, të drejtë dhe në përputhje me rrethanat faktike dhe juridike të krijuara gjatë kësaj periudhe. MABCO mbetet e përkushtuar ndaj një qëllimi të vetëm: përfundimit me sukses të Aeroportit Ndërkombëtar të Vlorës, certifikimit të tij sipas standardeve ndërkombëtare dhe vënies në operim në interes të qytetarëve të Republikës së Shqipërisë.

Mabco Constructions S.A. rezervon të gjitha të drejtat që rrjedhin nga Kontrata e Koncesionit, legjislacioni shqiptar në fuqi, si dhe nga instrumentet ndërkombëtare të mbrojtjes së investimeve, për të kthyer pergjigjien e plotë sapo letra e publikuar në media të mbërrijë pranë nesh si komunikim zyrtar si dhe për të zgjidhur këtë mosmarrëveshje në përputhje me ligjin dhe marrëveshjet ndërkombëtare.

MABCO Constructions S.A.

Përmes një shkrese zyrtare të firmosur nga ministri Karakaçi, kompanive u është lënë një afat prej 30 ditësh për të gjetur një zgjidhje që do të mundësojë mbylljen e punimeve dhe vijimin normal të projektit, ndryshe paralajmëron prishjen e kontratës.

Në kontratën e projektit thuhet qartë se "koncesionari është tërësisht përgjegjës për veprimet, vonesën dhe pakujdesinë" që lidhen me zhvillimin e projektit. Ndaj, ministria i referohet edhe parashikimeve të tjera kontratës, konkretisht pikës 15.4, e cila përcakton të drejtën e Autoritetit Kontraktues për zgjidhjen e kontratës në rast të mosrespektimit të afateve dhe detyrimeve.

Kompania ‘Mabco’ e drejtuar nga biznesmeni Behgjet Pacolli ka fituar gjyqin në Gjykatën e Lartë për çështjen e aeroportit të Vlorës duke fituar edhe kontrollin mbi këtë të fundit që është kthyer në mollë sherri mes ortakësh dhe që çoi në bllokimin punimeve atje.

Kolegji civil i Gjykatës së Lartë ka vendosur të rrëzojë padinë e bërë nga shoqëria "2A Group" e drejtuar nga biznesmeni Valon Ademi.

Më herët dy gjykatat e faktit i kishin dhënë të drejtë kompanisë “2A Group” në lidhje me kërkesën për sigurimin e padisë dhe pezullimin e të drejtave vendimmarrëse të ortakut tjetër ‘Mabco’ deri sa vendimi të merrte formë të prerë.

E gjithë përplasja ka nisur muaj më parë. Ndonëse palët kishin firmosur një kontratë noteriale, ku pjesa e aksioneve të shoqërisë së Ademit shkonte nga 2 në 49 përqind, kontrata nuk ishte regjistruar në QKB. Sipas “2A Group”, ortaku “Mabco” “në fshehtësi, dhe pa vendim asambleje, vendosi veton që çdo kontratë pezullohej, dhe këtë vendim e regjistroi si “Mabco” e jo në fakt si “VIA”. Çështja përfundoi në gjykatë, ku fillimisht u pezulluan disa të drejta të “Mabco”, ndërsa më pas Apeli kufizoi të drejtën e votës së kompanisë vetëm për vendimet që lidhen me tjetërsimin e aksioneve të pretenduara nga “2A Group”.

Konflikti u thellua pas një kontrate kredie 100 milionë euro të marrë nga “Mabco” me fondin “Delphos”, duke bërë që “2A Group” të kërkonte pezullimin e administrimit dhe përjashtimin e ortakut nga shoqëria. Gjykatat e shkallëve më të ulëta i dhanë të drejtë përkohësisht kompanisë së Ademit, por Gjykata e Lartë riktheu kontrollin e aeroportit tek “Mabco”.