Afera Partizani/ Berisha sulmon Irena Gjokën nga SPAK: I kërkuam KLGJ ta shqyrtojë mbarimin e mandatit! Fshehu dënimin në Greqi, duhet të ishte në burg

Tashmë që militantët janë gjithnjë e më të paktë krah Sali Berishës kur paraqitet në SPAK, duket se është të vetët e kanë braktisur.

Të vetmit ushtarë të fundit që e shoqëruan Berishën sot në SPAK, ishin dhëndri Jamarbër Malltezi, i pandehur gjithashtu në aferën Partizani, si edhe Tritan Shehu dhe djali i Fahri Balliut, Klevisi, i cili nuk lë moment pa i rënë në sy kryetarit.

Këto foto janë shkrepur nga LSA para shtëpisë së Berishës, kur ai do zbriste për të shkuar në SPAK në zbatim të masës detyrim paraqitjeje, ndërsa mister mbetet prania aty pranë e një mjeti me targa serbe...

Nga SPAK, ku u paraqit për të zbatuar masën detyrim paraqitjeje për aferën Partizani, Sali Berisha vijoi sulmet për gjyqtaren e hetimit paraprak, Irena Gjoka. Berisha tha se ajo nuk ka pasur kriteret për të qenë gjykatëse, pasi sipas tij ka fshehur dënimin nga Greqia për falsifikim dokumentesh. Sipas Berishës, ajo mbahet në detyrë vetëm se po mban dosjen Ilir Metës pa asnjë fakt penal, pasi Gjoka është gjyqtarja e seancës paraprake.

“Irena Gjoka nuk ka pasur kriteret për të qenë gjykatëse, kjo e bën çdo procedurë gjyqësore të drejtuar prej saj, pas zgjedhjes gjykatëse në kundërshtim me ligj, procedurë të kryer nga një gjykatë jo e caktuar me ligj.

Pra, çdo vendim i Irena Gjokës, që nga dita që ka mashtruar në formularët e dekriminalizimit, është i pavlefshëm, është nul sepse është marrë nga një person që nuk mund të ishte gjykatës.   Kjo, sipas Kushtetutës, por edhe sipas Gjykatës Europiane të të Drejtave të Njeriut. Sipas precedentit të Gjykatës Europiane të të Drejtave të Njeriut, Cani kundër Shqipërisë, Irena Gjoka nuk mund të jetë gjykatëse dhe proceset e ndjekura prej saj janë nul. Rikujtoj këtu se ajo mbahet në detyrë sepse ajo mban dosjen e Ilir Metës, dosje që nuk ka asnjë fakt penal, përveç vendimit hakmarrës primitiv të Edi Ramës ndaj tij”, tha Berisha.

Sulmet i vijoi duke e quajtur Gjokën delikuente.

“Kjo delinkuente që fshihet nga Altin Troplini, nga prokurori i përgjithshëm, nga kryeinspektori i përgjithshëm që thotë se nuk na kanë njoftuar, por duket se punonjësit e tij ia kanë fshehur dokumentet, pra kjo qëndron në detyrë duke shkelmuar Kushtetutën e vendit, duke shkelmuar ligjet me tre të pestat, që i diktojnë asaj largimin e menjëhershëm”, sulmoi Berisha.

Kreu i PD, Sali Berisha sulmoi kryepolicin Ilir Proda, pas arrestimit të avokatit Ulian Bajrami, pas debateve me prokurorin në sallën e gjyqit në Elbasan. Berisha tha se ky është terror që po u ushtrohet avokatëve që të mbyllin gojën në sallën e gjyqit.

“Arrestojnë avokatin në Elbasan, sepse guxoi t’i thotë prokurorit do të bej padi penale. Çfarë fyerje dhe çfarë kërcënimi është ky. Kur një njeri në sallën e gjyqit që mbronte një klient i thotë që po shpif dhe ky bandit me Prodën që është anëtar i bandës, thërret avokatin dhe e arreston të nesërmen. Të arrestosh avokatin në këtë mënyrë, ky është terrori mbi avokatët që të mbyllin gojën në sallën e gjyqit. Çfarë drejtësie është kjo. Kur e dëgjova, mendova se mos avokati ka humbur nervat dhe ka agresuar prokurorin dhe thashë kjo është e papranueshme, por kur pashë me regjistrime se çfarë ka ndodhur, kjo është turp. Këta që përpiqen të shndërrojnë krimet e tyre të shëmtuara në mburojë për drejtësinë, këta janë dy herë kriminelë”, tha Berisha.

Kreu i PD, Sali Berisha ka sulmuar kreun e SPAK, Altin Dumani. Nga Prokuroria e Posaçme ku u paraqit për të zbatuar masën detyrim paraqitjeje, Berisha e quajti Dumanin armik të pluralizmit dhe avokat të McGonigal.

“Avokatit të McGonigal, të krimeve kushtetuese dhe armikut të betuar të pluralizmit, të skllavit të pasurive të tij të paligjshme, apartamenteve etj”, tha Berisha ndërsa zbuloi se ky ishte mesazhi që i ka lënë Dumanit.