Afera 'Partizani'/ Berisha refuzon thirrjen, në GJKKO çon 2 avokatë! Padit në SPAK gjyqtaren Irena Gjoka, avokatët kërkojnë të përjashtohet! Shtyhet për nesër seanca

Megjithëse avokatët e Sali Berishës thanë se kanë paraqitur kërkesë për përjashtimin e gjyqtares Irena Gjoka, zyrtarisht gjykata bën të ditur se në kryesekretari, nuk është bërë një kërkesë.

Por sipas gjykatës, verbalisht ata kanë parashtruar se do të paraqesin kërkesë për përjashtim, por deri në këto momente (ora 17:50) nuk është regjistruar një kërkesë e tillë.

Gjykata ka njoftuar se seanca për Sali Berishën është shtyrë për ditën e nesërme në orën 14:30, pasui mbrojtësit kanë kërkuar që të njihen me aktet.

Avokatët e Sali Berishës kanë kërkuar përjashtimin e gjyqtares Irena Gjoka. Në një deklaratë për mediat avokati i ish-kryeministrit Genc Gjokutaj tha se kanë ngritur padi në SPAK ndaj gjyqtares së çështje Irena Gjoka për shpërdorim detyre. Sipas Berishës gjyqtarja Irena Gjoka ka dhënë një vendim në kundërshtim me Kushtetutën.

‘Kemi bërë kallëzim në SPAK ndaj gjyqtares Irena Gjoka, për veprën penale të 'shpërdorimit të detyrës’. Gjykimi është ndërprerë për të gjykuar këtë kërkesë. Po presim për vendimin e shqyrtimit të kërkesës për përjashtim. Ne nuk vijmë këtu për 3 orë e të lexojmë 20 mijë faqe. Berisha na ka autorizuar ne.’- tha Gjokutaj.

Sali Berisha pranon veprimet ligjore të ndërmarra gjatë kohës së qeverisjes së tij, të cilat sipas SPAK kanë favorizuar si fitues dhe dhëndrin e Jamarbër Malltezin në privatizimin e kompleksit Partizani.

Por Berisha justifikohet duke thënë se reformat në ligje që ka ndërmarrë ishin për të mirën e pronarëve dhe një ndër ta ishte dhe dhëndri.

“Këtë do ta bëja 1 mijë herë.  Këta 64 pronarë kanë përfituar 80 mijë euro ndërkohë që qindra mijëra pronarë të tjerë përfituan 30 – 40 milionë euro. Atëherë çfarë të bëja.  Të ndërprisja reformën apo ta përjashtoja?!  Qindra mijëra pronarë të tjerë kanë përfituar 30 – 40 milionë euro! Çfarë të bëja, të bëja një ligj të tillë që ju që jeni bashkëpronar me dhëndrin tim nuk do të përfitoni. Nuk kisha alternativë këtu. Ose të bëja ligjet e reformave, ose të mos i bëja fare ose të përjashtoja këta. Ka logjikë njerëzore? Askush në botë nuk mund ta thotë. Kjo është e gjitha.”

I bindur në tezën e tij, të cilën e thotë para gazetarëve por refuzon ta bëjë në gjykatë ku dhe thirrur, Berisha shkon më tej kur thotë se me ligjin e sportit nuk kishte favorizuar pronarët por sportin.

“Unë absolutisht i qëndroj. Të akuzosh për korrupsion se ke favorizuar, ndërkohë unë kam defavorizuar me ligj dhe kam favorizuar sportin. Unë me ligj kam defavorizuar pronarët dhe kam favorizuar sportin. Ata që pretendojnë se do të quajnë reformat korrupsion tregojnë imoralitet të plotë”

Ish kryeministri Berisha siç kishte paralajmëruar refuzoi të paraqitej në GJKKO në orarin e thirrur nga kjo gjykatë për tu marrë në pyetje por çoi dy avokatët.

Bëhet fjalë se Sokol Mengjezi dhe Genc Gjokutaj janë dy avokatët me prokurë të posaçme nga Berisha të cilët ndodhen në gjykatë.

Ish kryeministri Sali Berisha refuzon të përballet individualisht me drejtësinë për akuzën e korrupsionit pasiv të ngritur nga SPAK, por fshihet pas partisë dhe fton demokratët në luftën e tij

Në konferencën për median që nisi 30 minuta para orarit që ishte thirrur në gjykatë për tu pyetur lidhur me aferën e privatizimit të kompleksit ‘Partizani’ Berisha përsëriti se akuzat e tij janë politike.

79-vjeçari ka zgjedhur që ta përdorë PD-në e përçarë si një strehë për hallet e tij personale me drejtësinë.
 

“U them demokratëve ne jemi në luftë dhe Edi Rama i ka shpallur luftë opozitës dhe opozita do të qëndrojë me të gjithë forcën e saj. Kemi të bëjmë me një proces mostruoz politik. Edi Rama me dy skapistë dhe një tjetër vënë në tryezë reformat e suksesshme“ tha Berisha.

Ndërkohë në orën 14:00 duhej të ishte në GJKKO për tu marrur në pyetje por refuzoi ndërsa në gjykatë çoi avokatin e tij Genc Gjokutaj.

Lajmi ne perditesim... 

Ish-kryeministri Sali Berisha ka vendosur që të mos paraqitet në seancën e GJKKO, e cila e ka thirrur publikisht që të merret në pyetje mbi çështjen për aferën e privatizimit të Partizanit. Report Tv mëson se në seancë janë paraqitur avokatët e tij, Sokol Mengjezi dhe Genc Gjokutaj.

Berisha akuzohet për “Korrupsion pasiv të funksionarëve të lartë shtetërorë ose të zgjedhurve vendorë”. Gjykata e Posaçme e ka ndaluar atë të dalë jashtë vendit.

Anëtarja e Kryesisë së Rithemelimit, Jozefina Topalli është parë teksa futet në ambientet e zyrës së Sali Berishës.

Ajo po zhvillon një takim me ish-kryeministrin, ndërsa ky i fundit ka refuzuar që të paraqitet në seancën në GJKKO për çështjen e privatizimit të ‘Partizanit’.

Ish kryeministri Sali Berisha mbrohet pas preteksteve se e pengon Kushtetuta për të shkuar në gjykatë.

Në një prononcim për median, Berisha thotë se e pengon Kushtetuta për të shkuar në gjykatë dhe fton Ramën ta ndryshojë Kushtetutën.

"Po konsulotem të ndërmarr hapa ligjorë me juristë. Në çdo kohë unë jam gati të paraqitem për tu pyetur e për çdo gjë. E vetmja gjë që nuk mund të pranoj është të shkel Kushtetutën e vendit. Jam autor i ligjit që kjo mbrojtje nuk duhet të ekzistojë. Hajde të ndryshojmë Kushtetutën por jo ta menderosim atë"  tha Berisha në një prononcim për median jashtë selisë së Rithemelimit.

Ish-kryeministri Sali Berisha ka mbërritur në selinë e Rithemelimit. Sot në GJKKO pritet të mbahet senaca për Sali Berishën, sa i takon çështjes së privatizimit të Partizanit.