AKIP dorëzon firmat:
Referendum ose protesta

TIRANE - Aleanca Kundër Importimit të Plehrave (AKIP) dorëzoi sot në Komisionin Qëndror të Zgjedhjeve (KQZ) 60 mijë firmat e qytetarëve duke kërkuar organizimin e një referendumi mbarë popullor për ligjin e ri të menaxhimit të mbetjeve.

Nëse nuk merret parasysh kërkesa për referendum, AKIP bëri të ditur se “do të nisim protestat” ku “ne si pjesë e shoqërisë civile do të jemi iniciatorë”.

Zv/ministri i Mjedisit, Taulant Bino, deklaroi sot se referendumi ka sfond politik dhe se organizatorët e Aleancës Kundër Importimit të Plehrave janë të nxitur nga PS”

Në vitin 1994 shqiptarët morën pjesë në referendumin e parë, atë për Kushtetutën, ndërsa në vitin 1998 u votua për formën e shtetit, mes Republikës dhe Monarkisë. Në të dyja rastet kanë qenë nisma të ardhura nga qeveria. Më 2005 Aleanca për Mbrojtjen e Gjirit të Vlorës u refuzua të organizojë referendum për të kundërshtuar ndërtimin e një TEC-i.

TRYEZA DJE
Dje në një tryezë, ku ishin të pranishëm përfaqësues të shoqerisë civile, ambasadorë e politikanë është diskutuar mbi kuadrin ligjor për organizimin e referendumit. "Tek neni 126, paragrafi 3 i Kodit është një dispozitë, që ndër të tjera krijon kushtet për të realizuar referendumet për të shfuqizuar pjesë të ligjit, ndërkohë që kjo dispozitë është në kundërshtim me Kushtetutën e Shqipërisë, e cila në nenin 150 të saj, pikën 1, përcakton se referendumet mund të zhvillohen për shfuqizimin e ligjit", thotë Kristaq Kume, ish-kryetar i KQZ. Ndërsa ish-anëtari i Gjykatës Kushtetuese, Sokol Sadushi tha se "është një çështje procedure që do të vendosin organet përkatëse. Unë jam i mendimit se çështjen përfundimtare nëse duhet bërë ose jo referendumi duhet ta marrë Gjykata Kushtetuese". Besnik Mustafaj tha se referendumi është një praktikë, e cila është marrë peng nga politika. "Referendumi është praktikisht i marrë peng nga klasa politike, sepse tri referendumet e realizuara janë nisma të klasës politike", tha Mustafaj. Sekretari i Organizimit në PS, Blendi Klosi tha se opozita e mbështetur këtë nismë të një levizjeje qytetare. "Ne s'kemi qenë prapa këtij procesi, por krah jush. Anëtarët e PS në të gjithë Shqipërinë kanë qenë në mbështetje të hapur të një të drejte të hapur", tha Klosi. Ndërsa Ardian Klosi ka bërë një përmbledhje të historikut të referendumit në vendin tonë, qoftë atij politik apo të shoqërisë civile.
(im/sg/shqiptarja.com)

TAG:
• kqz