AKIP thirrje partive politike: Pro
apo kundër importit të plehrave?

Në prag të zgjedhjeve parlamentare Aleanca Kundër Importit të Plehrave ju bën thirrje të gjitha subjekteve që do të hynë në zgjedhje që të përcaktojnë në platformat e tyre nëse janë pro ose kundër importit të plehrave në Shqipëri.
 
Në një njoftim për mediat, AKIP ka bërë të qartë se do të jetë kundër çdo partie që nuk do ta konsiderojë ndalimin e importit të cdo lloj plehra-mbetjesh si një nga ceshtjet më kryesore në të mirë të qytetarëve dhe të të drejtave të tyre.
 
Njoftimi për median nga AKIP
 
Aleanca Kundër Importit të Plehrave ngre edhe njëhere fort zërin e saj për ndalimin e importit të plehrave në Shqipëri. AKIP e bën këtë në besim të 65000 firmëtareve që kërkuan ndalimin e importit të plehrave në vitin 2013 nëpërmjet referendumit kombëtar, që për herë të parë u shpall i ligjshëm dhe Presidenti Republikës caktoi datën e mbajtjes së tij në 22 Dhjetor 2013, si dhe në besim të rreth 90% të Shqiptarëve që janë shprehur për ndalim të importit të plehrave në sondazhe të ndryshme kombëtare. Në Shtator 2013 Kuvendi e njohu verdiktin e Shqiptarëve dhe ndaloi me ligj importin e plehrave.
 
Por qytetarët u tradhëtuan në 22 Shtator 2016 dhe importit të plehrave ju hap drita jeshile me anë të ligjit “Shalsi”.
 
Qytetarët rinisën betejën e filluar qysh në vitin 2004 kundër importit të plehrave dhe sot ja kanë dalë, që me mosdekretimin nga ana e Presidentit, importi i plehrave të jetë i ndaluar.
 
AKIP ka bindjen se cdo lloj importi plehra-mbetjesh mund të coj në një rrezik të pashmangshëm të shkatërrimit të perespektivës së zhvillimit të vendit.
 
Sot ne i bëjmë thirrje cdo Partie që po bëhet gati të shkoj në zgjedhjet Parlamentare të shprehet në mënyrë të qartë në plaformën e saj elektorale nëse është pro apo kundër importit të plehrave.
 
AKIP do të jetë kundër politikave të cdo partie që nuk do ta konsiderojë ndalimin e importit të cdo lloj plehra-mbetjesh si një nga ceshtjet më kryesore në të mirë të qytetarëve dhe të të drejtave të tyre.
 
Redaksia Online
Er.K/Shqiptarja.com