TIRANË- Deputetja demokrate Flutura Açka ka reaguar pas vendimit të qeverisë për konfiskimin e ndërtimeve pa leje. Demokratja shkruan se ky është një aksion i pastër gjobvënieie që qeveria ka marrë ndaj investitorëve për të mbushur arkën e buxhetit të shtetit me para. Ajo thotë se vetë qeveria i lejoi të ndërtohet pa leje, ndërsa sot paska marrë një aksion për t’i konfiskuar.

Sipas Açkës, ky vendim është marrë edhe për të tërhequr vëmendjen ndaj rritjes së çmimit të energjisë që u mor një ditë më parë për të gjitha familjet që harxhojnë 800 këh.  

“A keni ndonjë fije turpi?! Po sekuestroni godina shumëkatëshe pa leje? Po kush i lejoi këto godina të ndërtohen? Ju! Ky është një aksion i pastër gjobëvënieje për të mbushur arkën e shtetit dhe për të hequr vëmendjen nga rritja e çmimit të energjisë me të cilin i gjobitët dje shqiptarët. Sa kohë nuk ka të ndëshkuar për këto shkelje dhe dorëheqjet tuaja, kjo është vetëm kozmetikë.

Kështu e nisët pushtetin, duke sekuestruar ikona, gjysmat e të cilëve tani një zot e di ku janë. Uzurpimi pas shpine, brutaliteti fashist pa kurrfarë shqyrtimi të rregullave dhe ndërgjegjes, është domeni juaj i pushtetit. Aty jemi në substancën tuaj dhe të parëve tuaj. Doni t’iu shërbeni shqiptarëve? Çlironi edhe rrugicat e qyteteve nga kioskat e patronazhistëve tuaj”, shkruan Açka.

Një ditë më parë qeveria nisi aksionin për konfiskimin e ndërtimeve pa leje. Biznesmenit Jualian Morina, i njohur si Lul Morina, iu sekuestrua pallati 9-katësh te Liqeni i Thatë, pasi objekti ishte ndërtuar pa leje. Ndërkohë, sot iu sekuestrua 1200 metër katror e pallatit të biznesmenit Pëllumb Salillari në Farkë.