Bashkia Shkodër ka zbritur në terren në prishjen e gardheve dhe mureve rrethuese që pengonin hyrjen jo vetëm të banorëve në pallat por edhe të mjeteve zjarrfikëse pranë pallateve tek kryqëzimi i spitalit. 

Fadromet e IMT të Bashkisë Shkodër, Policia Bashkiake dhe Ndërmarrja e Shërbimeve Publike janë bërë pjesë e këtij aksioni që ka nisur sot me lirimin e e këtyre hapësirave të komunitetit.

Kryetari i Bashkisë Shkodër, Benet Beci në një postim në rrjetet sociale ka bërë publike edhe hartën me 41 pikat kritike që janë në evidentuar në qytetin e Shkodrës, të vendosura prej 30 vitesh dhe rrezikojnë jetën e banorëve në raste të rrezikut nga zjarri pasi është e pamundur ndërhyrja e mjeteve zjarrfikësve nga shtesat, avllitë apo edhe gardhe të ndërtuara në vite.
 

“41 pika kritike janë identifikuar në qytet, ku ndërtime të ngritura prej mbi 30 vitesh bllokojnë hyrjen e mjeteve zjarrfikëse. Sot strukturat e Bashkisë ndërhynë në njërën prej tyre, pranë kryqëzimit të spitaleve, ku jo vetëm që mungonte hapësira për raste emergjente, por edhe banorët hasnin vështirësi në qarkullim.

Paralelisht me lirimin e hapësirave publike do të vijojnë ndërhyrjet edhe në këto zona problematike, për t’i çliruar dhe për të shmangur çdo rrezik për qytetarët.”, thekson Beci.