Duke filluar nga e hëna e ardhshme, ish-krerët e UÇK-së do të dalin të dëshmojnë përpara Gjykatës Speciale të Hagës.

Ish-presidenti i Kosovës Hashim Thaçi do të dalë të hënën (9 nëntor). Në njoftimin për paraqitjen përpara gjykatësve thuhet se Thaçi do të informohet për të drejtat e tij.

“Gjithashtu, seanca mund të përcillet edhe nga galeria publike e sallës së gjyqit në ndërtesën e Dhomave të Specializuara të Kosovës në Hagë. Po ashtu, DHSK-ja ka edhe një qendër të posaçme për median në ndërtesën e vet në të cilën gazetarët mund të punojnë dhe të përcjellin seancat me një vonesë të shkurtër.”, thuhet në njoftimin e Speciales.

Ndërsa ish-kryeparlamentari Kadri Veseli do të dalë ditën e martën (10 nëntor). Seanca e tij do të jetë publike. Ish-shefi i Grupit Parlamentar të VV’së, Rexhep Selimi, do të paraqitet para Gjykatës Speciales për herë të parë të mërkurën (11 nëntor) në orën 11:00.

Paraqitja e tij e parë do të mbahet në seancë publike. Gjatë seancës, gjykatësi i procedurës paraprake siguron që të respektohen të drejtat e të akuzuarit, ndër të cilat e drejta për përfaqësim ligjor dhe që i akuzuari të kuptojë akuzat kundër tij.

Ndërkohë nuk dihet ende data e seancës për Jakup Krasniqi i cili është një tjetër i arrestuar në rradhët e figurave të larta politike. Ditën e djeshme, Gjykata publikoi dhe aktakuzën për këta persona si të përfshirë në krime kundër njerëzimit dhe krime lufte.

Në aktakuzën e ngritur pretendohet se nga marsi i vitit 1998 deri në shtator të 1999, Hashim Thaçi, Kadri Veseli, Rexhep Selimi, Jakup Krasniqi dhe anëtar të tjerë të UÇK Kanë kryer krime të shumta ndaj kundërshtarëve.