Pas deklaratave të Partisë Demokratike se vendosja e matësve inteligjentë është kosto për qytetarët, ka reaguar edhe Ministria e Energjetikës dhe Industrisë, e cila shprehet se Mjafton që qeveria të prezantojë një nismë dhe PD është kundër.
 
“Për opozitën nuk ka rëndësi nëse idetë e qeverisë sjellin modernizim, siguri, efikasitet, nëse ato janë risi që ndodhin në çdo vend tjetër të zhvilluar. Të gjitha janë të parëndësishme për Partinë Demokratike. Për ta ka vetëm një gjë rëndësi: Nëse një ide propozohet nga qeveria, duhet kundërshtuar. Me çdo kusht. Me çdo mënyrë.”- thuhet në reagimin e Ministrisë së PD.
 
Reagimi i plotë i Ministrisë së Energjetikës dhe Industrisë
Partia Demokratike është kundër çdo gjëje. Mjafton që qeveria të prezantojë një nismë dhe PD është kundër. Për opozitën nuk ka rëndësi nëse idetë e qeverisë sjellin modernizim, siguri, efikasitet, nëse ato janë risi që ndodhin në çdo vend tjetër të zhvilluar. Të gjitha janë të parëndësishme për Partinë Demokratike. Për ta ka vetëm një gjë rëndësi: Nëse një ide propozohet nga qeveria, duhet kundërshtuar. Me çdo kusht. Me çdo mënyrë.
 
 
Nihilistët e PD sot dolën kundër matësve inteligjentë të energjisë. Edhe pse një projekt pilot që tenton të ulë faturën e energjisë për qytetarët, sigurisht nihilistët e PD thonë të kundërtën. Shpifin për çmimin, shpifin për efektet anësore, shpifin për çdo gjë.
 
Ministria e Energjisë sqaron qytetarët se matësit inteligjentë janë një projekt pilot me kosto zero për shtetin shqiptar. Një projekt pilot që sjell në Shqipëri gjigandin e teknologjisë gjermane, Deutsche Telekom. Një projekt, pilot, që nëse do të funksionojë, do shënojë modernizimin më të madh e më të efektshëm në fushën e energjisë dhe teknologjisë, që do e rendiste Shqipërinë krahas vendeve më të zhvilluara e me eficencë më të lartë energjetike.
 
Redaksia Online
(a.h/shqiptarja.com)