Albana Shtylla: Qendrat e
votimit, jo në shkelje të ligjit

TIRANE- Anëtarja e KQZ, Albana Shtylla flet për Shqiptarja. com lidhur me projektvendimin më të ri që pritet të shqyrtohet dhe të miratohet në KQZ, atë të ngritjes së qendrave të votimit edhe në ambientet private në disa qarqe të vendit.

A jeni njohur me draftin që është përgatitur nga administrata e KQZ lidhur me qendrat e votimit në ambintet private dhe cili është gjykimi juaj?

Anëtarët e KQZ janë njohur para rreth dy ditësh, me draftin e përgatitur nga administrata, për qendrat e votimit të cilat KQZ do të vendosë që të ngrihen në objëkte private. Para se gjithash dëshiroj të sqaroj se sipas Kodit Zgjedhor, qëndrat e votimit krijohen si rregull në ndërtesa publike me hyrje të lirë. Pra, kjo do të thotë që njësitë e qeverisjes vendore të cilat kanë nën tagrin e tyre të drejtën e përcaktimit të Qendrave të Votimit, duhet që të ezaurojnë të gjitha mundësitë e ambjenteve publike, të cilat janë në territorin ku ato shtrijnë juridiksionin e tyre. Për më tepër njësitë e qeverisjes vendore në përcaktimin e vendndodhjes së qendrës së votimit, duhet të mbajnë në konsideratë edhe historikun e vendosjes së tyre në zgjedhjet e mëparshme, në mënyrë që zgjedhësit të jenë të orientuar lehtësisht, për gjetjen e tyre në ditën e votimit. Thënë ndryshe njësitë e qeverisjes vendore nuk mund të ndryshojnë qendrat e votimit të vendosura në ambjentet publike, nga njëra zgjedhje në tjetrën.

Çfarë parashikon Kodi Zgjedhor?

Gjithashtu Kodi Zgjedhor parashikon detyrimin që përpara se të merret vendimi për ngritjen e një qendre votimi në një ambjent privat, duhet që KQZ të ketë vlerësuar edhe mundësinë e vendosjes së saj në një ambient publik, në një zonë qendre votimi fqinje. Vetëm pasi të jenë bërë të gjitha përpjekjet e sipërcituara, dhe nuk ekzistojnë mundësi për vendosjen e tyre në ambjente publike, njësitë e qeverisjes vendore mund të bëjnë propozime pranë KQZ, për ngritjen e qendrave të votimit në objekte private. Megjithatë edhe në këto raste Kodi ka parashikuar që KQZ-ja do të marrë vendim pas të ketë vlerësuar me kujdes propozimet e njësive të qeverisjes vendore, për: - së paku dy objekte alternative, -planimetrinë e tyre apo fotografi të e ambientit, -lehtësitë që ofron objekti për zhvillimin normal të zgjedhjeve dhe -plotësimin e kritereve të tjera të parashikuara në nenin 93 të Kodit Zgjedhor. Përjashtim nga rregulli i paraqitjes se propozimit me dy objekte alternative, sipas Kodit Zgjedhor bëjnë vetëm rastet kur nuk është e mundur gjetja e një objekti tjetër alternativ privat të përshtatshëm, për qendër votimi. Pra nga sa më sipër, duhet të theksoj se përcaktimi i qendrave të votimit në objekte private nga KQZ, është një proces i cili kërkon një kujdes dhe vlerësim të plotë, mbi propozimet e paraqitura nga njësitë e qeverisjes vendore, por edhe për kriteret që këto ambjente duhet të përmbushin.

5 QARQET, QV NË SHTËPI E LOKALE PRIVATE

KQZ pritet të shqyrtojë një projekt-vendim lidhur me ngritjen e qendrave të votimit në ambiente private. Në relacionin që ka përgatitur administrata thuhet se në qarkun e Shkodrës janë propozuar për t’u ngritur 21 QV në ndërtesa private, në qarkun e Kukësit janë propozuar për t’u ngritur 4 QV, në qarkun e Dibrës janë propozuar për t’u ngritur 17 QV, në qarkun e Lezhës janë propozuar për t’u ngritur 27 QV dhe në qarkun e Durrësit janë propozuar për t’u ngritur 63 QV.


Intervista u publikua sot ne gazeten Shqiptarja.com

(sg/shqiptarja.com)

TAG:
• kqz