Një 37-vjeçar ka humbur jetën dhe pesë persona të tjerë janë helmuar nga monoksidi i karbonit në një kasolle të izoluar në veri të Italisë. Ngjarja ndodhi gjatë natës në zonën malore të Buscagna, në Luginën Devero, në komunën e Bacenos, në provincën Verbano-Cusio-Ossola, vetëm disa kilometra larg kufirit me Zvicrën.

Në kasolle ndodheshin gjashtë barinj, kur për arsye që ende nuk janë përcaktuar, u shkaktua grumbullim i monoksidit të karbonit. Një prej tyre, 37 vjeç, nuk mundi të mbijetonte.

Mes të helmuarve është edhe një 19-vjeçar, i cili ndodhet në gjendje kritike. Ai u transportua me urgjencë me helikopter drejt Spitalit Niguarda në Milano.

Dy persona të tjerë, të dy 62 vjeç, u evakuuan me helikopter dhe u dërguan në Spitalin e Novarës, ku po marrin trajtim mjekësor. Autoritetet kanë nisur hetimet për të përcaktuar shkakun e saktë të rrjedhjes ose grumbullimit të monoksidit të karbonit në kasollen malore. Ekipet e emergjencës ndërhynë në një zonë të vështirë për t’u aksesuar, ndërsa hetimet vijojnë për të zbardhur rrethanat e tragjedisë.