Mediat audiovizive që transmetojnë në analog kanë afat deri në datën 30 qershor për të kaluar në transmetimin numerik.
 
Nëpërmjet një deklarate, Autoriteti i Mediave Audiovizive (AMA), njofton se data përfundimtare e mbylljes së transmetimeve analoge në qarqet Tiranë e Durrës është data 30 qershor 2017.
 
“AMA ju tërheq vëmendjen të gjithë subjekteve audiovizivë që ushtrojnë veprimtari televizive analoge, të marrin masat për të mbështetur programin e tyre në rrjetin numerik të RTSH ose në njërin prej rrjeteve numerike kombëtare të licencuara nga AMA”, shkruhet në njoftimin e AMA.
 
Gjithashtu njoftohet edhe publiku i cili përfiton transmetimet televizive nëpërmjet teknologjisë analoge, se pas 30 qershorit nuk mund të shohin më transmetime televizive nëse nuk pajisen me marrës digjital (dekoderë të tipit DVB-T2).

Redaksia Online
(B.K/Shqiptarja.com)