VIDEO
Ambasadori Yasser Al-Najjar gjithashtu u shpreh gjatë intervistës së tij se Izraeli po kryen krime lufte në Rripin e Gazës dhe se synimi i kësaj mësymjeje 17 ditore është eliminimi i qeverisë së Unitetit Kombëtar (Qeveria teknike ende në fuqi në Palestinë) dhe mundësisë për bisedime për paqen. Gjë që automatikisht mund të çojë në njohjen dhe rindërtimin e Palestinës dhe fundin e gjenerimit të viktimave në masë.
Por në fundin e kësaj interviste Ambasadori Al-Najjar tha se kjo mësymje e fundit e Tel Avivit në Gaza është kapitulli përfundimtar i historisë së përgjakshme mes Izraelit dhe Palestinës:
“Ky është kapitulli përfundimtar. 2014 është kapitulli përfundimtar. Ose do të ketë paqe ose dicka tjetër. Nga palestinezët dhe e gjithë bota arabe.”- tha gjatë intervistës Ambasadori Al-Najjar.
(Në foto: Ambasadori palestinez në Tiranë Yasser Al-Najjar i ftuar në studion e A1 Report)
Më poshtë vijon intervista e plotë:
Së pari doja tju pyesja, se cfarë e shkaktoi këtë konflikt të ri mes Hamasit dhe Izraelit?
Al-Najjar: Në fakt nuk është mendimi im, por janë ngjarjet që monitorohen nga qindra agjenci lajmesh që tregojnë atë që ndodhi. Pra 3 javë më parë disa kolonë hebrenj në Bregun Perëndimor rrëmbyen një 17 vjecar palestinez, i mbushën gojën me benzinë dhe e dogjën për së gjalli. disa orë dhë ditë pas kësaj ngjarje të rëndë, 16 palestinezë u vranë nga ushtria izraelite, disa prej të cilëvë në shtëpi apo ndërsa shkonin në punë. vec kësaj gati 600 vetë u arrestuan në Bregun Perëndimor, mes tyre edhe 11 deputetë. Dhe e gjithë kjo u bë me pretendimin e një hakmarrje ndaj rrëmbimit dhe vrasjes së 3 adoleshentëve, për të cilët deri tani nuk dihet se kush i rrëmbeu. Besoj se çdo organizatë politike palestineze do të njoftonte menjëherë nëse do të kishin dijeni apo do tja arrinin të rrëmbenin kolonë apo ushtarë izraelitë. Askush nuk e bën një gjë të tillë për argëtim. Natyrisht që është një ngjarje kriminale, por e paqartë dhe e pa hetuar. Por të bësh një luftë masive kundër Gazës me dyshimin se aty gjenden vrasësit e këtyre 3 të rinjve, kjo nuk është dëgjuar ndonjëherë.
Po, por Izraeli ka drejtuar gishtin kundër Hamasit për këto tre vrasje.
Al-Najjar: Po ku janë provat? Hamasi nuk dha asnjë njoftim. Në çdo moment kur Hamasi apo ndonjë organizatë apo parti tjetër palestineze rrëmben një kolon hebre, e njoftojnë brenda dy orësh dhe kjo sepse bëjnë kërkesat e tyre. Kjo gjë nuk ndodh pra.
Deri tani janë mbi 650 njerëz të vrarë në Rripin e Gazës. Tashmë edhe OKB po akuzon Izraelin se sulmet nuk janë të shënjestruara por po shkaktojnë viktima edhe tek civilët ndonëse qeveria izraelite ka deklaruar se objektivi i sulmeve janë vetëm militantët e Hamasit. Cila është situata në Rripin e Gazës, nuk e di nëse ju keni njerëzit tuaj atje, cilat janë dëshmitë e tyre?
Al-Najjar: Po në fakt, kam familjarë të mitë atje. Kam një mik i cili është sekretari i ministrit tonë të jashtëm dhe 27 anëtarë të familjes së tij u vranë nga një sulm i vetëm ajror. Pra një familje e tërë. Njerëzit në Gaza, ashtu si në Norvegji blejnë toka dhe ndërtojnë shtëpi disa katëshe ku fëmijët me familjet e tyre jetojnë të gjithë së bashku. Pra nëse Izraeli kërkon të vrasë një lider të Hamasit, nuk ka pse të sulmojë dhe shkatërrojë një ndërtesë të tërë. Dhe çështë më e keqja, lideri nuk qëndron zakonisht aty, qoftë i Hamasit apo i Organizatës për Çlirimin e Palestinës. Kjo është në të vërtetë një luftë ndëshkuese, për të rrënjosur në ndërgjegjen e publikut sa vicioz Izraeli mund të jetë, që njerëzit të ndryshojnë mendje. Kjo është një luftë politike. Veç kësaj të gjithë ata që i kanë parë videot e avionëve apash të Izraelit e dinë shumë mirë se piloti mund të shohë mjaft qartë se kë po qëllojnë. Ata thonë se ka dëme kolaterale, por nuk mund të kemi dëme kolaterale 82 %, por nuk është një dëm i tillë. Kjo është dicka që nuk e kishim parë deri më sot. 32 familje nga mbi 600 viktima që kemi sot, janë shuar, pra e gjithë familja. Qindra fëmijë të vrarë, mbi 80 % e viktimave janë gra dhe fëmijë dhe këtë e konfirmon edhe OKB, jo ne. Ata madje bombarduan edhe një spital për invalidët dhe të moshuarit. Vetëm dje një inxhinier gjermano palestinez që punon për një kompani energjetike u vra me gruan dhe 4 fëmijët e tij si pasojë e një sulmi me predhë kundër një ndërtese 11 katëshe. A janë këto vrasje individuale? A përdoren avionë apashë dhe F 16 për të vrarë një person të vetëm?
(Në foto: Ambasadori palestinez në Tiranë Yasser Al-Najjar i ftuar në studion e A1 Report)
A po kryen Izraeli krime lufte në Gaza?
Al-Najjar: Padyshim që po. me të gjitha mjetet dhe sipas të gjitha ligjeve ndërkombëtare dhe OKB padyshim që do të thotë fjalën e vet për këtë. Pati një takim në Gjenevë i komisionit të të drejtave të njeriut dhe ne presim konkluzionet e tij shumë shpejt që do ta konfirmojnë këtë gjë.
Po në fakt dhe Navi Pillay, zyrtarja më e lartë e të drejtave të njeriut në OKB i ka dënuar sulmet e Izraelit në Rripin e Gazës duke thënë se ka dyshime për krime lufte. Ju folët ndërkaq për një luftë politike. Pse, cili është qëllimi i Izraelit për këtë përshkallezim të dhunës?
Al-Najjar: Disa muaj më parë, ne diskutuam pikërisht këtu në A1 Report për pajtimin mes Organizatës për Clirimin e Palestinës dhe Hamasit, cka coi në krijimin e një qeverie të unitetit kombëtar, por bëhet fjalë për një qeveri teknokrate dhe jo me politikanë për të cilën ne shpresonim që do të arrinte të bënte dy gjëra, së pari rindërtimin e asaj cka u shkatërrua në 2012 në Gaza nga Izraeli dhe objektivi i dytë ishte përgatitja për zgjedhjet e ardhshme ato presidenciale dhe parlamentare, në mënyrë që populli palestinez të kishte mundësi të zgjidhte lidershipin e tij. Kjo luftë ka për qëllim ti japë fund kësaj qeverie dhe për të treguar se i gjithë problemi është mes Izraelit dhe radikalëve palestinezë, duke nënkuptuar sipas tyre Hamasin. Pra është një luftë evazive. Ata thjesht nuk duan të ulen në tryezën e negociatave dhe Izraeli do të bëjë gjithcka për të shmangur bisedimet, kanë 20 vjet që e bëjnë një gjë të tillë. Dhe dua tu kujtoj izraelitëve, palestinezëve dhe gjithkujt se ishin izraelitët radikalë ata që vranë ish kryeministrin izraelit Jitzhak Rabin i cili nënshkroi marrëveshjen e paqes, dhe nuk ishin palestinezët që e vranë. Por janë izraelitët që sot janë në pushtet, në qeveri që vranë kryeministrin e tyre.
Pra nëse çdo gjë do të shkonte mirë me qeverinë e re të unitetit kombëtar, Izraeli do të detyrohej të ulej në një tryezë me Hamasin dhe Fatah, apo jo?
Al-Najjar: Pikërisht, do të duhej të pranonte këtë qeveri që morri edhe mbështetjen e SHBA-ve. sekretari amerikan i shtetit Xhon Kerry e pranoi këtë qeveri dhe i dha mbështetje.
Po, por tani SHBA-të dhe Kerry janë të qëndrimit që Izraeli ka të drejtën të vetëmbrohet nga predhat e Hamasit.
Al-Najjar: Është një mbështetje në parim. Cdo shtet në botë ka të drejtën të vetëmbrohet. Edhe ne e kemi këtë të drejtë. Por kjo nuk është një luftë. Luftë do të ishte një F16 kundër një avioni Mig. Por një F16 kundër predhave artizanale që bëhen në shtëpi nuk është një luftë por një sulm i njëanshëm. Nëse SHBA-të apo kushdo tjetër njeh shtetin e Izraelit që u krijua në vendin tim në 1948-ën dhe të drejtën e tij që të vetëmbrohet edhe ne kemi të drejtë të mbrohemi me të gjitha mjetet e mundshme. E drejtë apo e gabuar, kjo ska të bëjë me llojin e armëve që përdoren por me të drejtën që kemi edhe ne për tu vetëmbrojtur.
(Në foto: Ambasadori palestinez në Tiranë Yasser Al-Najjar i ftuar në studion e A1 Report)
A mendoni se ky konflikt i ri u provokua për të mos lejuar vazhdimin e negociatave izraelito-palestineze?
Al-Najjar: Po në fakt. Presidenti ynë Mahmoud Abas ka negociuar me Izraelin për gati 20 vjet, sa 20 vjeçarë mund të ketë një vend për të çuar dëm? 20 vjet negociata dhe kemi hequr dorë nga çështjet më të rëndësishme që kemi kërkuar. Edhe vetë SHBA dhe BE e kanë pranuar se Izraeli nuk është i gatshëm për paqe. Pse? Sepse ata vazhdojnë të zaptojnë tokat tona duke ndërtuar vendbanime të tjera, në atë tokë për të cilën kemi biseduar. Atëherë si mund të bisedojmë ne të dy për një picë, se cila është pjesa ime dhe cila e jotja nëse ti je duke e ngrënë atë? Pra këtu bëhet fjalë për një filozofi dhe jo krijimin e një shteti.
Cili është qëndrimi i presidentit Mahmoud Abas dhe qeverisë në Bregun Perëndimor për gjithë situatën në Gaza?
Al-Najjar: Lidershipi palestinez dhe presidenti Abas e kanë bërë të qartë që do të mbështesin popullin në Gaza dhe të drejtën e tyre për tu vetëmbrojtur. Ne jemi me popullin në Gaza dhe përpjekjet e tyre me të gjitha mundësitë që kemi dhe ende po vazhdojmë të negociojmë edhe sot me SHBA-të dhe OKB. Dhe ka shenja që thonë se mund të kemi shumë shpejt një armëpushim. Por cfarë do të ndodhë pas armëpushimit është cështja? Kjo është e gjitha në dorë të Izraelit, pra pushtuesit. Është ai që duhet ti përgjigjet këtyre pyetjeve. Ne nuk mund të lejojmë që të na vrasin gratë dhe fëmijët palestinezë çdo dy vjet. Ne refuzojmë ta lejojmë një gjë të tillë dhe ata duhet ta kuptojnë që nuk do ta lejojmë një gjë të tillë.
Pra po thoni që është jetike që të gjendet një zgjidhje përfundimtare?
Al-Najjar: Ky është kapitulli përfundimtar. 2014 është kapitulli përfundimtar. Ose do të ketë paqe ose dicka tjetër. Nga palestinezët dhe e gjithë bota arabe.
Pra është një qëndrim i përbashkët ky?
Al-Najjar: Po në fakt. Shihni rrugët në Londër, gati gjysmë milion njerëz jo arabë që dalin kundër Izraelit dhe 1 miljon në Cikago. Po kështu edhe në Pakistan dhe në lindje të Afganistanit
Po çfarë mund të bëjnë ata, përvec protestave?
Al-Najjar: Ne shpresojmë shumë që të vazhdojë të jetë në nivelin e protestave me shpresën që liderët në perëndim dhe vendet demokratike ta kuptojnë mesazhin. Ne politikanët refuzojmë këto vrasje masive. Ne nuk mund të kontrollojmë gjithcka, asnjë vend nuk mundet. Askush nuk di si të nisë dhe ti japë fund një lufte. lufta nis por nuk dihet se si mbaron.
(Në foto: Ambasadori palestinez në Tiranë Yasser Al-Najjar i ftuar në studion e A1 Report)
Ju thoni, kësaj here do të jetë paqe ose dicka tjetër, çfarë?
Al-Najjar: Askush nuk mund ta thotë me saktësi. Pas kësaj lufte askush nuk mund të vazhdojë të jetë i duruar, sic ka bërë deri më tani presidenti palestinez Mahmoud Abas i cili ka vite që tregohet i duruar, i mencur dhe fleksibël duke u ulur me Izraelin për të negociuar procesin e paqes ndërsa ata vazhdojnë ta shkatërrojnë këtë proces. Ata jo vetëm që kanë dëmtuar vagonin e paqes por madje tani po i heqin edhe binarët e shinave duke mos lejuar mundësinë të mbërrijë vagoni tjetër.
Pak muaj më parë sekretari amerikan i shtetit xhon Kerry tha se ekzistonte rreziku i një intifade të tretë. Mendoni se tani ekziston mundësia që ky konflikt të zgjerohet edhe më shumë?
Al-Najjar: I kemi parë të gjithë preludët në fakt, dhe jo vetëm në Palestinë. Shiheni situatën nëpër vendet fqinje, është me të vërtet e frikshme, edhe për ne. Mungesa e procesit të paqes do të sjellë vetëm radikalë, pra radikalizëm ekstremist. shihni vendet fqinje Iraku dhe Siria. Edhe vetë ne kemi probleme me këtë radikalizëm, pa përmendur interesat e huaja dhe burimet e energjisë në këtë zonë. Është një situatë ekstremisht e rrezikshme por askush nuk po i kushton vëmendje. Ata po përballen me konlfiktin izraelit-palestinez si një çështje farefisnore. Por nuk është e tillë. Këtu kemi një komb që ka pushtuar një komb tjetër.
Po reagimin e komunitetit ndërkombëtar mbi këtë konflikt të ri në Rripin e Gazës, si e gjykoni?
Al-Najjar: Kemi parë shumë keqardhje dhe dënim të këtyre sulmeve. Por keqardhja nuk i jep fund sulmeve dhe vrasjeve. Kemi 32 familje të shuara thuajse plotësisht, pra të gjithë anëtarët e familjes.
Mendoni që BE, SHBA dhe komuniteti ndërkombëtar duhet ti bëjë më shumë presion Izraelit që ky konflikt të marrë fund?
Al-Najjar: Nuk bëhet fjalë për presion. Vetëm një fjalë nga Shtëpia e Bardhë dhe Izraeli i jep fund sulmeve brenda 5 minutash. E kemi parë këtë gjë, në rastin e Xhorxh Bush babait në 1991-92. Mjaftoi një fjali dhe gjithcka ndaloi. Ai ngriu ndihmat amerikane për Izraelin që shkonin në 10 miliard dollarë dhe gjithçka mbaroi.
Po lëshimi i predhave. Përse Hamas nuk i jep fund sulmeve me predha?
Al-Najjar: Ata do të ndalojnë por duan një marrëveshje përpara. Asnjë luftë nuk mund të ndalojë pa një marrëveshje. Duhet një marrëveshje që ti japë fund sulmeve, të parashikojë tërheqjen e trupave dhe pjesën politike. Por Izraeli duhet të tërhiqet. Mbase njerëzit nuk e kuptojnë por Rripi i Gazës është sa gjysma e Durrësit me 1.8 milion banorë. A mundet Durrësi të luftojë gjysmën e Europës apo NATO-n. Kjo është ajo me cka po përballimi pra.
Edhe diçka tjetër zoti ambasador. Veç reagimit ndërkombëtar, doja tju pyesja cfarë mendoni për reagimin e autoriteve shqiptare për këtë situatë, ose më saktë mungesën e një reagimi nga Tirana zyrtare?
Al-Najjar: Është vërtet për të ardhur keq dhe zhgënjyese sepse shqiptarët kanë vuajtur ashtu si ne, kanë përjetuar ngjarjet që ne po përjetojmë sot. Fushat e vrasjeve që shqiptarët kanë përjetuar ne i kemi parë dhe i dimë shumë mirë dhe madje ka patur palestinezë që kanë vdekur atje bashkë me shqiptarët. Palestinezë që kanë luftuar përkrah shqiptarëve.
E keni fjalën për Kosovën?
Al-Najjar: Po në Kosovë dhe në Bosnje. Pra të dy ne pupujt e kuptojmë shumë mirë agresionin. Dhe kudo që ka një agresion, në Europë, Azi apo diku tjetër, palestinezët kanë dhënë kontributin e tyre. Disa kanë shkuar si mjekë për të ndihmuar miqtë tanë në mbarë botën. Ndaj dhe presim që qeveria shqiptarë të na mbështesë, si pjesa tjetër e Europës, ose të paktën të mbajë qëndrimin zyrtar të Bashkimit Europian. Kjo është më e pakta që presim nga një vend mik me të cilin kemi shekuj marrëdhëniesh të mira. Viktima ndonjëherë kërkon edhe një zë që ta mbështesë, një zë të qartë që të pranojë se e gjithë kjo që po ndodh nuk është e drejtë. Ne jemi me ju dhe do të bëjmë më të mirën. Nuk po kërkojmë më shumë. Nuk po kërkojmë ushtrinë shqiptare apo ushtrinë e ndonjë vendi tjetër europian që të vijë të na ndihmojë. por thjesht ti thonë mikut të tyre Izraelit ti japë fund kësaj.
(Në foto: Ambasadori palestinez në Tiranë Yasser Al-Najjar i ftuar në studion e A1 Report)
Cili do të jetë hapi i radhës nga ana e palestinezëve?
Al-Najjar: Ajo që duam tani është të arrihet një armëpushim dhe të rinisim bisedimet. cdo ditë është një shans për tju rikthyer negociatave. Por nëse Izraeli vazhdon, do ti drejtohemi Gjykatës Ndërkombëtare të Drejtësisë dhe do të kërkojmë një hetim ndërkombëtar për krime lufte dhe genocid duke iu referuar konventës së Gjenevës.
A besoni se do të ketë një zgjidhje të shpejtë? Çfarë shpresoni?
Al-Najjar: Po shpresojmë që po. Asnjë luftë nuk vazhdon pafundësisht. Në këtë shekull asnjë luftë nuk mund të vazhdojë për më shumë se disa javë.
Zoti ambasador, ju falenderoj shumë për këtë intervistë. Nëse keni dicka për të shtuar, një mesazh për publikun shqiptar që ju sheh në këto momente.
Al-Najjar: Dua vetëm ti them publikut shqiptar nga i cili kam parë e degjuar shumë solidaritet. Faleminderit, ju jemi borxhlinj përgjithmonë.
Redaksia Online
(e.c/shqiptarja.com)
Lajme të tjera
-
Nustricionisti dhe specialisti i Mjeksisë Holistike, Altin Joka: Ndryshimi i stilit të jetës dhe të ushqyerit ju zgjat jetën
24 Nëntor, 13:32 -
Kardio-Kirurgu Pediatrik Prof. Arben Baboci: Kam punuar me zemër për zemrën e fëmijëve
24 Nëntor, 13:29
-
Invalidët pa kujdestar zhytin familjet në varfëri! Familja e Asqeri Durajt nga Memaliaj jeton me 12 mijë lekë në muaj! Gruaja e të paralizuarit: Na e hoqën kempin
24 Nëntor, 13:16
-
Me flamujt kuq e zi në duar, shqiptarët presin Ramën në Londër (VIDEO)
24 Nëntor, 13:13 -
Militantë të Berishës protestojnë kundër Ramës në Londër (VIDEO)
24 Nëntor, 12:59 -
'Ata ishin 2 autorë!' Policia do të rimarrë në pyetje babain e shokut të Martinit: Djali tjetër ka pasur thikë më të vogël
24 Nëntor, 12:44 -
Vuçiç mesazh kërcënues: Jeta është luftë, Serbia do të fitojë
24 Nëntor, 12:42 -
Putin dhe ëndrra për Ukrainën si një shtet kukull i Moskës! Plani i tij për të pranuar armëpushimin
24 Nëntor, 12:38
-
Vrasja e 14 vjeçarit, Flutura Açka: U harrua thelbi i familjes po endet drejt spektaklit! Urgjente hapja e shkollës së riedukimit
24 Nëntor, 12:22 -
Gjikondi: Ja taktika e çiftit Meta-Kryemadhi për të shpëtuar pronat e vendosura në mënyrë të paligjshme! Ja pse administrata Trump nuk do t’i heqë ‘non-gratën’ Berishës
24 Nëntor, 12:13 -
Kickbox/ Skandal në Malin e Zi, arbitri godet me trofe në fytyrë trajnerin kosovar (Video)
24 Nëntor, 11:43 -
Ulja e temperaturave, uji i ngrirë krijon kristale akulli në Dibër! Ngrica edhe në segmentin e Rrugës së Arbrit (VIDEO)
24 Nëntor, 11:37
