TIRANË- Ambasadorët e SHBA-së dhe BE-së, Yuri Kim dhe Luigi Soreca, kanë zhvilluar një takim me kreun e Këshillit të Emërimeve në Drejtësi, Vitore Tusha. Theksi është vendosur tek domosdoshmëria që Gjykata Kushtetuese të jetë funskionale brenda 31 dhjetorit.

"Luigi Soreca dhe unë u takuam sot me Kryetaren e Këshillit të Emërimeve në Drejtësi, Tusha, për të rikonfirmuar afatin kohor për emërimin e kandidatëve të kualifikuar në Gjykatën Kushtetuese. Takimi i nesërm i KED - i cili, si zakonisht, përfshin vëzhgues nga Parlamenti & Presidenca - duhet ta çojë procesin përpara, në mënyrë që Shqipëria të ketë një GJK funksionale deri më 31 dhjetor. Kur kjo të ndodhë, udhëheqësit – sidomos Presidenti Ilir Meta, Kryetari i Parlamentit Ruçi dhe Kryetarja e KED Tusha – do të meritojnë lëvdata për ndërmarrjen e veprimeve urgjente, në përputhje me opinionin e Komisionit të Venecias & në përgjigje të kërkesës së popullit shqiptar për Reformën në Drejtësi",  shkruan Kim.

Ky është një mesazh i përsëritur nga ambasadorët më të rëndësishëm në vend. Një javë më parë ambasadorja Kim përshëndeti progresin e arritur në drejtim të arritjes së objektivit brenda vitit, bërjen e një Gjykata Kushtetuese funksionale.

Ndërkohë që ambasadori Soreca në një intervistë për DW i kujtoi autoriteteve në Shqipërisë së pa një Gjykatë Kushtetuese nuk mund t'i hapet rrugë mbajtjes së Konferencës Ndërqeveritare. Kujtojmë se dy ditë më parë Këshilli i Emërimeve në Drejtësi, në mbledhjen e radhës, nga gjashtë kandidatë konfirmoi për të vazhduar garën kandidatët Altin Binaj dhe Aleksandër Toma. Më herët KED ka konfirmuar edhe kandidaten Sonila Bejtja e cila garon në vakancën e shpallur nga presidenti Ilir Meta.