Amir Abrashi vrapoi më shumë nga
kuqezinjtë, Napoli rinovim Hysajt

Drejtuesit e Napolit janë gati të blindojnë yjet e tyre. Presidenti i klubit napoletan, Aurelio De Laurentiis po punon intensivisht për zgjatjen e kontratës së mbrojtësit të djathtë, Elseid Hysaj.

Ky i fundit konkretisht ka nënshkruar një kontratë me Napolin që skadon në qershor të vitit 2020. Hysaj dhe Insigne konsiderohen si dy objektivat e drejtuesve napoletanë, për të qëndruar gjatë te Napoli.

Sipas asaj që raporton “Gazzetta dello Sport”, drejtuesit e Napolit kanë përgatitur tashmë kontratën e re për mbrojtësin e Kombëtares Kuqezi, Elseid Hysaj. Një kontratë me afat skadence 2021. Referuar asaj që raportohet nga mediat italiane, më shumë se zgjatja me një vit e kontratës, synohet rishikimi i kushteve dhe termave financiare. Joshja e Hysajt financiarisht nga Napoli do të minimizojë dëshirën e lojtarit për tu larguar nga klubi.

Ndërkohë që kombëtarja jonë është kthyer në Shqipëri, UEFA në bazë të disa statistikave ka zgjedhur më të mirin në kombëtaren tonë. Sipas të dhënave të fundit të publikuar nga UEFA, lojtari më i mirë për Shqipërinë në tre ndeshje është përzgjedhur Amir Abrashi.

Kjo zgjedhje e tij ka ardhur për shkak të kilometrave që ai ka vrapuar në fushë.  Abrashi ka vrapuar rreth 35.112 metra, ndërkohë që vendi i parë shkon për futbollistin çek Vladimir Darida 37.394 metra.

Gjithashtu një futbollist tjetër që renditet në këtë listë është edhe Granit Xhaka, shqiptari që aktualisht luan me kombëtaren e Zvicrës. Për sa i përket përqindjes së mbajtjes së topit në fushë kombëtarja jonë zë vendin e tretë nga fundi (42%) dhe lë pas Irlandën e Veriut (34%)  dhe Islandën (35%).

Gjithashtu ekipet që kanë kontrolluar lojën janë: Gjermania (66%), Spanja (61%), Portugalia (61), Zvicra dhe Anglia me nga 58%. Po kështu Kombëtarja renditet në vendin e tretë për faullet e pësuara pas Polonisë dhe Turqisë, me 43 të tillë bashke me Italinë dhe Portugalinë. 



Redaksia Shqiptarja.com