Anëtari i LSI në KQZ, Manjani:
Vetëm Parlamenti mund ta heqë

TIRANE - Nënkryetari i Lëvizjes Socialiste për Integrim, Ylli Manjani e vlerëson antikushtetuese kërkesën e Partisë demokratike dhe vendimin e sotëm të Komisionit të Ligjeve për zëvendësimin e anëtarit të tyre në KQZ me një përfaqësues të mazhorancës.

Në një deklaratë për mediat nga selia e LSI-së, Manjani tha se çdo veprim për zëvendësimin e anëtarëve i takon Parlamentit, ndërsa shtoi se Kuvendit duhet të mbajë një qëndrim për shkelje të Komisionit të Ligjeve.

Duke e cilësuar një lojë të Partisë demokratike, nënkryetari i LSI-së, tha se me këto veprime po preken dhe dhunohen zgjedhjet.

“Këto janë procedura që e nxjerrin institucionet e vendit, zgjedhjet e lira në një kontekst ilegal. Ky është një moment që çdo parti politike duhet të mbajë qëndrimet e saj”, u shpreh Manjani.

Manjani theksoi se cilat janë ato raste kur mund të zëvendësohet një anëtar:
1-Kur ai apo ajo kryen veprimtari politike
2-Mbush moshën
4-Jep dorëheqjen
5-Kryen vepër penale
Nëqoftëse ndonjë nga këto raste ndodh, theksoi ai, -i takon KQZ-së dhe jo Komisionit të Ligjeve, i takon Parlamentit që të zëvendësojë një anëtar.

“Bëjmë thirrje që të rikthehet klima e besimit dhe të kthehet legjitimiteti në procesin e përgatitjeve të zgjedhjeve”, përfundoi nënkryetari i Lëvizjes Socialiste për Integrim, Ylli Manjani.

Redaksia Online
(Gre.M/Shqiptarja.com)

TAG:
• kqz