Apeli miraton ekstradimin e Ahmet Isufajt, xhaxhai i 'Ben Qimes'! Do përballet me drejtësinë në Kosovë, për trafik droge

Report Tv ka siguruar foton e Ahmet Isufaj nga Fieri, xhaxhai i Arben Isufaj ose siç njihet ndryshme me nofkën “Ben Qimja”, një personazh mjaft i njohur në vend për sa i përket lidhjeve të tij me krimin dhe politikën.

Gjykata e Apelit Vlorë, ka miratuar kërkesën e prokurorisë për ekstradimin e Isufajt. 65-vjeçarit Ahmet Isufaj, do t'i duhet të ekstradohet në Kosovë, pasi pikërisht drejtësia e këtij vendi, e kërkon me çdo kusht fierakun e përfshirë në veprimtari kriminale në fushën e trafikut të drogës kryer në formën e “Grupit të strukturuar kriminal”, me disa shtetas kosovarë.

Vendimi për lejimin e ekstradimit të Isufajt, është marrë pak kohë më parë në Vlorë dhe pritet që të ekzekutohet sapo këtë çështje ta shqyrtojë dhe Gjykata e Lartë në Tiranë. Këto çështje shqyrtohen me një procedurë ekstra ligjore, pasi kërkesat për ekstradim, kanë afate ligjore dhe në rast të shkeljes, automatikisht do të sillnin dhe dështimin e ekstradimeve.

Isufaj, ndodhet në masën e “arrestit në shtëpie” ku rruhet me policë tek dera. Vendimi për zbutjen e masës së sigurisë nga "Arrest në burg" 40 ditor në "Arrest shtëpie", është marrë në muajin dhjetor 2019 nga gjykata e Apelit Vlorë, ku treshja e gjyqtarëve Petrit Aliaj, Klodiana Gjyzari dhe Hysen Saliko, pranuan kërkesën e Isufaj për ndryshimin e masës së sigurisë.

Ahmet Isufaj, së bashku me nipin e tij, Arben Isufaj, janë objekt i operacionit “Forca e Ligjit” OFL, për të deklaruar pasurinë e tyre. 65-vjeçari Isufaj rezulton në kërkim nga Gjykata e Prishtinës për akuzën e “Krimit të organizuar” si dhe “Blerje, posedim, shpërndarje dhe shitje e paautorizuar e narkotikëve të rrezikshëm”.

Më 6 dhjetor 2019 Ahmet Isufaj teksa qëndronte në një bar përballë burgut të Fierit, ra në prangat e policisë, së bashku me djalin e tij, Amarildo Isufaj, pas një operacioni të zhvilluar nga Forcat Operacionale të Fierit, ku djalit të tij ju sekuestrua një pistoletë pa lejë me 15 fishekë dhe një thikë biçak, sende këto për të cilat ai u dënua me 3 vjet e 4 muaj burgim.

Por dhe ky dënim u rrëzua nga gjyqtarja Matilda Shalla, e cila urdhëroi pezullimin e dënimin me burgim, duke e konvertuar atë në shërbim prove për një periudhë prej 3-vjeçare, me qëllim që Amarildo Isufaj gjatë kësaj kohe, të mos kryejë asnjë vepër tjetër penale.

/b.ha./Shqiptarja.com

TAG:
• droge
• arben isufaj
• ben qimja
• ahmet isufaj