Telashet e borxheve të kompanisë ARMO duket se nuk kanë fund. Përveç bankave e disa kompanive private, janë OSHEE dhe Ujësjellësi i Fierit që kanë kërkuar sekuestrimin e disa pronave të kompanisë për shkak të detyrimeve të pashlyera. Faturat e pashlyera ndaj këtyre subjekteve shtrihen që në vitin 2009.
 
Por OSHEE dhe Ujësjellësi i Fierit nuk janë të vetmet që kërkojnë sekuestrimin e pronave të kompanisë.
 
Vetëm pak javë pas rikthimit të ARMO-s në punë përmes një marrëveshjeje me kompaninë Ionian Refining dhe Trading Company, kreditorët e ARMO-s janë vërsuluar për të bllokuar apo shitur asetet e saj.
 
Në muajin nëntor një tjetër shoqëri përmbarimore nxorri në ankant 54 prona të ARMO-s me një vlerë prej 25 milionë dollarësh.
 
Praktikisht në shitje dolën të gjitha trojet e objektet e rafinerisë së Ballshit në pronësi të ARMO, duke nisur nga ndërtesat e magazinat, te zyrat, repartet, qendra shëndetësore madje dhe rrugët e Kombinatit të Thelluar të Përpunimit të Naftës.
 
Lajmi për rikthimin në punë të ARMO-s dhe gjetja e gjuhës së përbashkët me kreditorët u përshëndet dhe nga Qeveria.
 
Shoqëria deklaroi se arriti të gjejë gjuhën e përbashkët me bankat kreditore të ARMO-s si dhe punonjësve të saj, por situata e borxheve mbetet ende e rëndë, ndërkohë që pak ditë më parë në Rafinerinë e Ballsshit ndodhi dhe një shpërthim i rëndë që shkaktoi vdekjen e një punonjësi.
 
Aktualisht ARMO menaxhohet nga Ionian Refining dhe Trading Company, kompani e regjistruar në Shqipëri më 29 prill të vitit 2016.
 
Kompania është themeluar nga një shoqëri e regjistruar në Ishujt Virxhin britanikë, e njohur si parasjë fiskale.
 
Sipas vlerësimeve, borxhet e ARMO-s arrijnë në total rreth 250 milionë euro, 200 milionë ndaj bankave, dhe rreth 50 milionë euro detyrime ndaj tatimeve.
 
Aktualisht 85 % e kompanisë zotërohet nga një grup azer i quajtur Heni Asets dhe 15 % nga shteti shqiptar.
 
Grupi azer e bleu kompaninë nga Rezart Taçi, por u largua sërish pasi u njoh me situatën e borxheve të saj.

 
 dy.b/shqiptarja.com