U arrestua dje në Shkodër, kush është Bledar Cafi i dënuar më parë në Itali për trafik droge dhe grup kriminal

SHKODËR - 41-vjeçari Bledar Cafi i arrestuar mbrëmjen e djeshme në SHkodër është dënuar më parë për trafik droge dhe pjesëmarrje në grup të strukturuar kriminal.

Ai u arrestua nga policia shqiptare me qëllim ekstradimin drejt Italisë ku dë të vijojë dënimin e tij.

Më datë 4 qershor të 2020, Gjykata e Triestes në Itali e dënoi Cafin me 4 vite dhe 2 muaj burg për trafik droge në sasi të mëdha.

“Kapet dhe arrestohet me qëllim ekstradimi drejt Italisë, 41-vjeçari i dënuar për veprat penale ‘Pjesmarrje në grup të strukturuar kriminal’ dhe ‘Trafikim droge në sasi të mëdha’. Në vijim të punës për kapjen e personave në kërkim ndërkombëtar, në bazë të informacioneve të siguruara në rrugë operative, nga strukturat e DVP Shkodër u kap dhe u ndalua me qëllim ekstradimi drejt Italisë, shtetasi Bledar Cafi, 41 vjeç, banues në Shkodër, i shpallur në kërkim ndërkombëtar nga Zyra Qendrore e Interpol Tirana” – njofton policia.

Policia nuk bën me dije detaje lidhur me aktivitetin kriminal të Bledar Cafit. Ky i fundit i përket familjes Cafi në Shkodër ku pak më herët Shqiptarja.com ka zbardhur pasurinë e plotë të familjes.

"Shqiptarja.com” zotëron një raport të policisë së Shtetit, që bën fjalë për të kaluarën kriminale të vëllezërve Bledar dhe Gëzim Cafi në Shkodër, që të dy objekt i hetimit nga OFL-ja. Në këtë raport thuhet se dy vëllezërit Cafi ose ndryshe Bokrri, janë të dënuar jashtë dhe brenda vendit. Por kjo nuk i ka penguar ata të ngrenë biznese në qytetin e Shkodrës.

Sipas këtij raporti, Bledar Cafi ose Bokrri, i arrestuar në Francë dhe ekstraduar në Shqipëri si pjesëmarrës në një vrasje rezulton të ketë ngritur biznese në Shqipëri, si Bar-Kafe, një kompani peshkimi në lumin Buna dhe një njësi tregtare të produkteve me shumicë dhe pakicë në Shkodër. Sipas raportit të policisë njësia tregtare është hapur në datën 6 prill 2018 në lagjen “Salo Halili” në Shkodër. Objekti i kësaj njësie  tregtare është “Tregtim i artikujve ushqimorë me shumicë dhe pakicë”.

E.M./b.ha./Shqiptarja.com

TAG:
• trafik droge
• Shkoder
• itali
• Bledar Cafi