Abuzime me fondet e BE në SASPAC/ Arrestohet ish ministri i Shëndetësisë, Ilir Beqaj e bashkëpunëtori i tij Kurtulaj! Në total u firmosën 7 urdhërarreste (EMRAT)

Tirane- Ish ministri i Shëndetësisë Ilir Beqaj është arrestuar sot (4 korrik) nën dyshimet për përfshirje në skemën e abuzimit për përfitime nga fondet e Agjencisë së koordinimit të ndihmës së huaj dhe programet e BE-së, SASPAK ( Agjencia Shtetërore e Programimit Strategjik) gjatë kohës që ai e drejtonte këtë institucion. Gjithashtu ai akuzohet dhe për fshehje pasurie.

Me kërkesë të SPAK dhe firmosur nga GJKKO është arrestuar dhe i besuari i Beqajt, Ermal Kurtulaj i cili ka mbajtur dhe postin e koordinatorit të projektit EUSAIR që menaxhohej nga SASPAC dhe Alfred Nikolla,. Ndërkohë 4 po hetohen në masa më të buta sigurie konkretisht: biznesmeni Gazmend Haxhia, Elton Marini, menaxher i futbollistëve, Bledar Leka dhe Bjona Zijaj.

Në njoftimin zyrtar SPAK zbardhi skemën e abuzimit me fondet e BE-së nga SASPAC për të cilën sot i janë vënë prangat Ilir Beqaj dhe dy bashkëpunëtorëve të tij, ndërsa 5 po hetohen në gjëndje të lirë.

Në cilësinë e Drejtorit të Përgjithshëm të SASPAC-ut duke vepruar si urdhërues në bashkëpunim me personin nën hetim Ermal Kurtulaj, i emëruar nga vetë personi nën hetim Ilir Beqaj në datën 26.05.2022 si koordinator i zyrës “Facility Point” për projektin EUSAIR, në SASPAC,  përgjatë viteve 2022-2023 dyshohet se kanë kryer procedura prokurimi fiktive në kundërshtim me rregullat “PRAG” të përcaktuara në “Rregullat e Zbatimit të Rregullores Financiare”, të aplikueshme për të gjitha kontratat e ndihmës së jashtme të BE-së të financuara nga Buxheti i Përgjithshëm i BE-së dhe Fondi i 10-të Evropian i Zhvillimit (EDF) dhe të detyrueshme për t’u zbatuar sipas nenit 5 gërma “c” të ligjit nr. 37/2015 “Për Ratifikimin e Marrëveshjes Kuadër Ndërmjet Republikës së Shqipërisë, Përfaqësuar nga Këshilli i Ministrave i Republikës së Shqipërisë dhe Komisioni Evropian për Rregullat e Zbatimit të Mbështetjes Financiare Të BE-së për Shqipërinë, në kuadër të Instrumentit për Asistencën e Paraanëtarësimit (IPA II)”.

LEXO EDHE:
Arrestimi i Ilir Beqajt/ Mjeku në 'Përballje' e akuzon për krime kundër njerëzimit! Avokati: Është rast unik, mund të ketë akuzë tjetër për 'Sterilizimin'

Flitet për të paktën tetë shërbime të prokuruara në kuadër të eventeve organizuar në vitin 2023 tek të cilat fituesi është dakordësuar dhe përcaktuar shumë më para se të realizohet procedura e prokurimit, e cila është kryer në mënyrë fiktive më pas, për efekt dokumentacioni dhe pagese. Në një rast për një darkë tek lokali Grozna, që sipas SPAK është në pronësi të tij që kushtoi 4.1 mln lekë të reja, fatura u fry në 125 mijë euro. 

Këto tendera janë zhvilluar me procedurë negocimi konkuruese apo prokurim të thjeshtë, të cilat janë urdhëruar për t’u kryer nga Beqaj në cilësinë e Drejtorit të Përgjithshëm, i cili ka nënshkruar që nga rënia dakord për të kryer shërbimin e caktuar, tek ftesat që i’u janë dërguar subjekteve për të paraqitur oferta sipas llojit të prokurimit, tek urdhri për ngritjen e komisionit për të kryer vlerësimin e ofertave, tek shkresa që i është dërguar fituesit pas vlerësimit deri tek lidhja e kontratës, dokumenta këto të hartuara, plotësuara dhe nënshkruara kohë më pas, nga lidhja dhe zbatimi i kontratës.

Në total janë firmosur 7 urdhërarreste: 3 arrest me burg, dy arrest shtëpie, dy detyrim me paraqitje. Nga ana e oficerëve të Byrosë Kombëtare të Hetimit, si dhe policisë, janë ekzekutuar deri më tani 6 masa sigurimi personal për personat nën hetim, ndërkohë Shqiptarja.com mëson se nuk ështe ekzektuar vendimi për Gazment Haxhinë pasi rezultonte se ndodhej jashtë. 

Akuzat
7 personat në hetim akuzohen për  “Korrupsioni pasiv i funksionarëve të lartë shtetërore”, kryer në bashkëpunim, parashikuar nga neni 260 dhe 25 i Kodit Penal, “Korrupsioni aktiv i funksionarëve të lartë publikë”, parashikuar nga neni  245 i Kodit Penal, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni  257/a/2 i Kodit Penal, “Mashtrimi” kryer në bashkëpunim, me pasoja të rënda parashikuar nga nenet 143/2/ 3 i Kodit Penal, si dhe “Shkelja e barazisë së pjesëmarrësve në tendera apo ankande publike”, kryer në bashkëpunim parashikuar nga neni 258/2 dhe 25 i Kodit Penal.  Sipas dosjes Bjona Ziaj ka qenë konsulente financiare e përfshirë në skemën e faturave fiktive.

Beqaj akuzohet për fshehje te pasurisë 
Beqaj dyshohet se ka kryer deklarim të rremë të pasurisë së tij që nga viti 2020 e në vazhdim, pasi ka fshehur interesat pasurore të tij mbi restorantin “Groza” pranë Kalasë Tiranë, që nga krijimi e deri në vazhdim.

"Dyshohet se Beqaj të ketë investuar në vitin 2019 në shoqëri të paktën shumën prej 21.411 euro dhe 4.666.110  lekë, në formën e blerjeve të pajisjeve (aseteve) dhe në shumën 34.783 Euro në formën e shpenzimeve si qira e të tjera, duke mos i deklaruar ato si hua ndaj shoqërisë. Interesat pasurore të tij mbi këtë restorant i ka ushtruar nëpërmjet personit nën hetim Ermal Kurtulaj i cili ka administruar ato, duke qenë i punësuar në këtë restorant që nga krijimi i tij, por pa qenë i deklaruar si i punësuar pranë organeve tatimore. Po kështu dyshohet se automjeti me të cilin lëvizte Beqaj, dhe Ermal Kurtulaj ishte shofer ishte e tija"

Beqaj me pranga ne drejtori
Ishte ora 09:30 minuta kur Beqaj me duar të lidhura prapa shpine shoqërohej në ambientet e drejtorisë së policisë së Tiranës. Gazetari i Shqiptarja.com dhe Report Tv Sokol Dema, siguroi videon e momentit kur ai po shoqërohej nga policia 

Urdhër arrestet janë firmosur nga prokurorja Elida Kaçkini që urdheroi pak muaj më parë edhe kontrollin e banesës së Beqajt. Ndërkohë masat e sigurisë jan firmosur dje nga gjyqtarja e GJKKO-së, Rudina Palloi. 

 Ilir Beqaj mori postin e kreut të Agjencisë Shtetërore e Programimit Strategjik në nëntor 2022 dhe qëndroi 1 vit. SPAK informon se gjatë hetimeve janë ushtruar kontrolle në disa banesa dhe në njërën nga zyrat e shoqërisë tregtare ku janë sekuestruar dokumente dhe blloqe me shënime, shuma parash prej afro 47. 000 euro dhe 700.000 lekë, aparate telefoni me interes për  hetimin..

Ndërkohë Beqaj është në hetim nën masën e sigurisë 'detyrim me paraqitje" për ‘shpërdorim detyre’ lidhur me  kontratën koncensionare të sterilizimi  me vlerë 100 milionë euro dhe afat 10-vjeçar, të fituar nga biznesmeni Ilir Rrapaj.

Shenim: Raportoi për Report Tv dhe Shqiptarja.com Keti Banushi e Sokol Dema. 

Lajmi ne perditesim... 

TAG:
• ilir beqaj
• SASPAC
• Ermal Kurtulaj
• alfred nikolla
• gazment haxhia
• Elton Marini
• bledar leka
• bjona zijaj

Sondazhi i ditës:

Skandali tek Onkologjiku, e kujt është përgjëgjesia?

• Mjekëve

  37.7%

• Ministrisë

  59.7%

• Nuk e di

  2.6%

Vota total: 2022

Votat totale janë unike

• Sondazhi i ditës:

  Skandali tek Onkologjiku, e kujt është përgjëgjesia?

  Mjekëve Ministrisë Nuk e di