'ARRSH dha 13 tendera me vlerë 200 mln euro', Karabina: Do ta denoncojmë në SPAK! Kriteret pamundësonin konkurrimin e kompanive të tjera

Grupi i PD të Lulzim Bashës, ka paralajmëruar se do të denoncojë ARRSH në SPAK, pasi dha 13 tendera me vlerë 200 mln euro klientëve të qeverisë.

Kjo është bërë me dije nga zëdhënsja e grupit, Mirela Karabina, e cila sot në një deklaratë për mediat, është shprehur se ARRSH shpalli të paktën 13 procedura tenderimi për ndërtim ose rehabilitim rrugësh me kritere dhe kushte që u pamundësonte konkurrimin kompanive ndërkombëtare.

“Para dy muajsh, Autoriteti Rrugor Shqiptar (ARRSH) shpalli të paktën 13 procedura tenderimi për ndërtim, zgjerim ose rehabilitim rrugësh në një vlerë totale afërsisht 200 milionë euro. Edhe pse këto procedura u publikuan në media ndërkombëtare, ministrja Balluku me zgjatimet e saj në ARRSH për të favorizuar 5 oligarkët e përhershëm që marrin këto tendera, vendosi në kriteret e tenderimit kushte dhe afate që asnjë kompani e huaj nuk kishte mundësi t’i plotësonte.

LEXO EDHE:
Ndryshimet në qeveri, Meta: Nga frika e ‘dëshmisë’ së Ahmetajt, Rama zëvendësoi 3 kukulla politike me 3 të tjera anonime

Ne do të depozitojmë në SPAK një kallëzim penal për këtë bandë të drejtuar nga Belinda Balluku si ministre e linjës duke përfshirë funksionarë të ARRSH që kanë firmosur kriteret për të përjashtuar kompani shqiptare apo të huaj për të marrë pjesë në garë”, tha ajo.

Karabina shprehet se kompanitë që kanë fituar tenderin janë klientë të qeverisë.

“Prokurimet publike që publikoi ARRSH kishin një afat për depozitimin e dokumentacionit nga 30 deri ne 35 ditë kalendarike, ndërkohë që nga portali i E-Albania duhen 40 ditë për të marrë përgjigje nga Ministria e Infrastrukturës e drejtuar nga Belinda Ballaku për njehësimin e licensave. Dhe sot rezulton që kompanitë që kanë fituar tenderat për ndërtim, zgjerim apo rehabilitim të rrugëve janë kompani shqiptare, klientë të qeverisë”, tha ajo.

S.B/Shqiptarja.com